پشاور ، کرک میں 5 دہشتگردانہ حملے،3 پولیس اہلکار اور ایک ایف سی گارڈ شہید

 خیبر پختونخوا کے دو اضلاع پشاور اور کرک میں دہشت گردوں نے مختلف مقامات پر 5 حملوں میں 3 پولیس اہلکار اور 1 ایف سی گارڈ کو شہید کر دیا جبکہ حملے میں دو پولیس اہلکار زخمی ہوئے ہیں۔
سیکیورٹی ذرائع کے مطابق ضلع کرک میں دہشتگردوں نے تھانہ تخت نصرتی اور تھانہ حرم پر حملے کیے جس میں پولیس سب انسپکٹر اسلم نور شہید ہوئے، اس کے علاوہ کرک میں سوئی گیس فیلڈ پر حملے میں ایک ایف سی اہلکار شہید ہو گیا۔
ڈی پی او کرک شہباز الہیٰ کا کہنا تھا کہ کرک کے دو تھانوں پر دہشتگردوں کے حملوں کو ناکام بنا دیا ہے، دہشتگردوں نے تھانہ خرم اور تھانہ تخت نصرتی پر بھاری ہتھیاروں سے حملہ کیا تھا۔
دوسری جانب پشاور میں تھانہ مچنی گیٹ اور تھانہ خزانہ کے مقامات پر دہشتگردوں نے فائرنگ کی، مچنی گیٹ پر حملے میں پولیس اہلکار نذر علی شہید ہوئے، پولیس نے فوری جوابی کارروائی کر کے دہشتگردوں کو پسپا کر دیا۔
مقامی پولیس حکام کے مطابق حملے کے بعد پولیس کی جانب سے بھرپور جوابی کارروائی کی جارہی ہے۔
پولیس کی جوابی فائرنگ سے حملہ آور فرار ہونے میں کامیاب ہوگیا، ملزم کی گرفتاری کیلیے علاقے کا محاصرہ کرکے سرچ آپریشن کیا جارہا ہے۔