قومی سلامتی پارلیمانی کمیٹی کا ان کیمرہ اجلاس کچھ دیر میں شروع، پی ٹی آئی کا شرکت سے انکار

قومی سلامتی پارلیمانی کمیٹی کا ان کیمرہ اجلاس اسپیکر قومی اسمبلی ایاز صادق کی صدارت میں اب سے کچھ دیر بعد شروع ہوگا تاہم تحریک انصاف نے اجلاس میں شرکت سے انکار کردیا۔

ملک میں بڑھتی ہوئی دہشت گردوں کے خلاف قومی اتفاق رائے پیدا کرنے کی کوشش کے لیے قومی سلامتی پارلیمانی کمیٹی کا ان کیمرہ اجلاس آج اسپیکر قومی اسمبلی ایاز صادق کی صدارت میں منعقد ہوگا۔

اجلاس میں وزیر اعظم میاں محمد شہباز شریف کے علاوہ وزیر دفاع خواجہ آصف، رانا ثنااللہ احسن اقبال شرکت کریں گے۔ وفاقی وزرا ریاض پیرزادہ، توقیر شاہ، رانا تنویر، ڈاکٹر طارق فضل چوہدری اور عطا اللہ تارڑ بھی اجلاس میں شریک ہوں گے۔ جام کمال خان ، حنیف عباسی، امیر مقام، اویس لغاری، سردار محمد یوسف، پرویز خٹک، رضا حیات حراج، جمال شاہ کاکڑ، سردار یعقوب اور دیگر بھی اجلاس کا حصہ ہوں گے دریں اثنا، پاکستان تحریک انصاف نے قومی سلامتی پارلیمانی کمیٹی کے اجلاس میں شرکت سے انکار کردیا ہے۔

تحریک انصاف کے سیکریٹری جنرل سلمان اکرم راجا نے کہا ہے کہ ہم نے اس اجلاس میں شریک ہونے سے انکار کردیا ہے، یہ فیصلہ ہم نے گزشتہ روز سیاسی کمیٹی کے اجلاس میں کیا۔ انہوں نے کہا کہ تحریک انصاف کا کوئی نمائندہ اجلاس میں نہیں جائے گا تاہم علی امین گنڈا پور بطور وزیر اعلیٰ خیبر پختونخوا اس اجلاس میں شریک ہونگے۔ْ

سلمان اکرم راجا نے واضح کیا کہ ہم اس وقت کسی بھی آپریشن کے حق میں نہیں ہیں، 77 سالوں سے ان حالات کا شکار ہیں اور ان حالات کے حق میں نہیں ہیں، ہمارا مطالبہ ہے کہ عمران خان کو پے رول پر رہا کیا جائے، ہم نے اس ملک کو ٹھیک کرنا ہے اور فسطائیت کا خاتمہ کرنا ہے۔

واضح رہے کہ تحریک انصاف نے گزشتہ روز قومی سلامتی پارلیمانی کمیٹی کے اجلاس میں شرکت کا فیصلہ کیا تھا اور اس حوالے سے اسپیکر قومی اسمبلی کو شرکت کرنے والے اپنے ارکان کی فہرست بھجوا دی تھی۔

تحریک انصاف کی جانب سے قومی اسمبلی میں اپوزیشن لیڈر عمرایوب، چیئرمین پی ٹی آئی بیرسٹرگوہر خان، زرتاج گل، اسد قیصر، علی محمد خان، سینیٹ میں قائد حزب اختلاف شبلی فراز، سینیٹر ہمایوں مہمند اور سینیٹر علی ظفر نے اجلاس میں شرکت کرنا تھی۔

اس کے علاوہ فہرست میں حامد رضا، عون عباس، زبیرخان، ثنااللہ مستی خیل، بشیر خان اور عامر ڈوگر کے نام بھی شامل تھے۔