وفاقی کابینہ کے اراکین کی تنخواہوں اور الاؤنس میں 188 فیصد تک اضافہ 

اسلام آباد:وفاقی کابینہ اراکین کی تنخواہوں اور الاؤنس میں اضافہ کردیا گیا، وفاقی کابینہ نے سرکولیشن کے ذریعے سمری کی منظوری دے دی۔
وفاقی وزیروں اور وزرائے مملکت اور مشیروں کی تنخواہوں میں 188 فیصد تک اضافہ کیا گیا ہے، وفاقی وزراء نے اپنی اور وزرائے مملکت کی تنخواہوں میں اضافے کی سمری منظور کرلی۔
وفاقی وزراء اور وزرائے مملکت کے الاؤنس اور تنخواہوں کے ایکٹ 1975 میں ترمیم کی گئی ،نئے بل کی منظوری کے بعد وفاقی وزیر، وزیر مملکت اور مشیر کی تنخواہ 5 لاکھ 19 ہزار ہوگی۔
خیال رہے کہ اس سے پہلے وفاقی وزیر کی تنخواہ 2 لاکھ اور وزیر مملکت کی 1 لاکھ 80 ہزار تھی۔
اسی طرح وفاقی وزیر کی تنخواہ میں 159 فیصد اضافہ منظور کیا گیا جبکہ وزیر مملکت اور مشیر برائے وزیراعظم کی تنخواہوں میں بھی ایک 188 فیصد تک اضافہ منظور کیا گیا ہے۔
واضح رہے کہ 2 ماہ قبل اراکین پارلیمنٹ کی تنخواہ اور مراعات وفاقی سیکریٹری کے برابر کرنے کے معاملے پر فنانس کمیٹی نے ایم این ایز اور سینیٹرز کی تنخواہ و مراعات میں اضافے کی منظوری دی تھی۔