امریکا اپنی حاکمانہ سوچ سے دوسرے ممالک کو نشانہ بنانا بند کرے، چین

چین نے امریکا کو منہ توڑ جواب دیتے ہوئے کہا کہ امریکا چینی کمپینوں کو بلاوجہ نشانہ بنا رہا ہے، چین امریکی اقدام کا سختی سے جواب دے گا۔

میڈیا رپورٹ کے مطابق چین کی وزارت خارجہ کے ترجمان گو جیاکھون نے پریس بریفنگ میں کہا کہ امریکا اپنی حاکمانہ سوچ سے دوسرے ممالک کو نشانہ بنانا بند کرے۔ چینی کمپینوں کو برآمدی پابندیوں کی لسٹ میں شامل کرنے کی مذمت کرتے ہیں۔

چین کی وزارت خارجہ کے ترجمان گو جیاکھون نے کہا کہ امریکا نے اپنی قومی سلامتی کو خطرے میں ڈالنے اور خارجہ پالیسی کی خلاف ورزی کے بہانے اندھا دھند غیر قانونی اور یکطرفہ پابندیاں عائد کرنے کے لئے اینٹیٹی لسٹ اور دیگر برآمدی کنٹرول ہتھکنڈوں کا غلط استعمال کیا ہے۔ امریکا کے یہ اقدامات واضح طور پر تسلط پسندانہ عمل ہے۔

امریکی محکمہ تجارت کی برآمدی پابندیوں کی فہرست میں 10 سے زائد چینی اداروں کے شامل ہونے سے متعلق ایک سوال پر انہوں نے کہا کہ ایسا اقدام بین الاقوامی قوانین اور بین الاقوامی تعلقات کے بنیادی اصولوں کی سنگین خلاف ورزی ہے۔ اس طرح کے اقدامات کاروباری اداروں کے جائز حقوق اور مفادات اور عالمی پیداوار اور سپلائی چین کی سلامتی اور استحکام کو نقصان پہنچاتے ہیں۔

ترجمان نے کہا کہ چین ان اقدامات کی سختی سے مخالفت کرتا ہے اور اس کی شدید مذمت کرتا ہے، انہوں نے کہا کہ چین اپنے کاروباری اداروں کے جائز حقوق اور مفادات کے تحفظ کے لیے ضروری اقدامات کرے گا۔