بھارتی فضائیہ میں اڑتے تابوت سر درد بن گئے،ایک اور لڑاکا طیارہ گر کر تباہ،دونوں پائلٹ جاں بحق

جورہاٹ: بھارتی فضائیہ میں اڑتے تابوت مودی سرکار کیلئے سر درد بن گئے، ایک اور لڑاکا طیارہ سخوئی 30 دوران پرواز گر کر تباہ ہو گیا۔

بھارتی میڈیا رپورٹس کے مطابق روسی ساختہ سخوئی 30لڑاکا طیارہ آسام کے شہر جورہاٹ کے ایئر بیس سے تربیتی پرواز کے لیے اڑا تھا،پرواز کے کچھ دیر بعد طیارے کا ریڈار سے رابطہ منقطع ہوگیا۔

میڈیا رپورٹس کے مطابق طیارہ جورہاٹ سے تقریباً 60 کلومیٹر دور ضلع کاربی آنگ لونگ کے پہاڑی علاقے میں گر کر تباہ ہوا۔ حادثے کے بعد سرچ اور ریسکیو ٹیمیں فوری طور پر جائے وقوعہ پر پہنچ گئیں۔

رپورٹس کے مطابق حادثے میں دونوں پائلٹ جان کی بازی ہار گئے،بھارتی فضائیہ نے واقعے کی تحقیقات شروع کر دی ہیں تاکہ حادثے کی وجوہات معلوم کی جا سکیں۔

واضح رہے کہ یہ روسی طیارے سن 2000 میں بھارتی فضائیہ کے بیڑے میں شامل کیے گئے تھے اور یہ طیارے بھارتی فضائیہ میں بنیادی حیثیت رکھتے ہیں۔

دوسری جانب ایک رپورٹ کے مطابق گزشتہ 30 سال میں بھارتی فضائیہ کو 550 سے زائد فضائی حادثات کا سامنا کرنا پڑا جن میں 150 سے زائد پائلٹس حادثات میں ہلاک ہوچکے ہیں۔