وزیراعظم کی زیر صدارت عسکری و صوبائی قیادت کی بڑی بیٹھک،جعفر ایکسپریس کے حملہ آوروں کو بے نقاب کرنے کا فیصلہ

وزیرِاعظم شہباز شریف کی زیرِ صدارت وفاقی اور صوبائی قیادت کے اہم اجلاس میں جعفر ایکسپریس کے حملہ آوروں کو بے نقاب کرنے کا فیصلہ کر لیا گیا۔

اسلام آباد میں وزیراعظم شہباز شریف کی زیر صدارت ہونے والے اجلاس میں وفاقی اور صوبائی قیادت بھی موجود تھی۔ اجلاس میں جعفر ایکسپریس کے حملہ آوروں کو دنیا کے سامنے بے نقاب کرنے میں کوئی کسر نہ چھوڑنے کا فیصلہ ہوا ہے۔

ذرائع کا کہنا ہے کہ وزیراعظم کی زیرِصدارت بڑی بیٹھک میں نیشنل ایکشن پلان کے تحت قومی بیانیے کو مضبوط کرنے پراتفاق کیا گیا ہے۔ اجلاس میں یہ فیصہ بھی کیا گیا کہ سوشل میڈیا پر جھوٹی خبروں کا سدباب کیا جائے۔ اجلاس میں عسکری و سول قیادت نے بھی شرکت کی۔ چاروں صوبوں، آزادکشمیر، گلگت بلتستان کے نمائندے بھی شریک ہوئے، اجلاس گزشتہ روز وزیرِاعظم ہاؤس میں ہوا۔

وزیراعظم کی زیر صدارت اجلاس میں یہ فیصلہ بھی ہوا کہ روایتی اور ڈیجیٹل میڈیا پر ملک دشمن مہم کا منہ توڑ جواب دیا جائے، قومی بیانیے اور ملکی سلامتی کے خلاف ہرقسم کے مواد کا سد باب کیا جائے گا۔اجلاس میں ملکی سلامتی اور ہم آہنگی کیلئے تمام صوبوں کا تعاون اور آپسی روابط بڑھانے پر اتفاق کیا گیا۔ قومی بیانیہ نوجوانوں تک پہنچانے کیلئے فلم، ڈراموں میں موضوعات اپنائے جائیں گے۔

اجلاس میں فیصلہ کیا گیا کہ قومی بیانئے کے لئے ڈیجیٹل میڈیا پر بھی مواد نشر کیا جائے، دہشتگردی کے منفی معاشرتی اثرات کو اجاگر کیا جائے اور قومی نصاب میں دہشت گردی کے حوالے سے آگاہی شامل کی جائے۔

واضح رہے کہ 11 مارچ کو کالعدم بی ایل اے نے بلوچستان کے علاقے بولان میں جعفر ایکسپریس پر حملہ کر کے مسافروں کو یرغمال بنا لیا تھا، سیکیورٹی فورسز نے 2 روز آپریشن کر کے تمام دہشت گردوں کو ہلاک کیا۔