کویت کا ورک پرمٹ کی درخواست دینے والوں کی تعلیمی اسناد کی تصدیق جانچنے کیلئے نیا نظام متعارف

کویتی حکام نے ملازمتوں کے لیے درخواست دینے والے کارکنوں کے لیے تعلیمی سرٹیفکیٹس کی تصدیق جانچنے کے لیے ایک نیا نظام متعارف کرا دیا ہے۔

گلف نیوز کے مطابق اس سسٹم کا اطلاق غیر ملکیوں، GCC شہریوں، اور بے وطن افراد پر ہوتا ہے جو آن لائن پورٹلز کے ذریعے ورک پرمٹ کے لیے درخواست دے رہے ہیں۔

کویت کی جانب سے یہ نیا نظام ملازمت کے درخواست دہندگان کی جانب سے جمع کرائے جانے والے جعلی تعلیمی دستاویزات کے سامنے آنے کے بعد متعارف کرایا گیا ہے۔ اس کا اصل مقصد کویت کی جاب مارکیٹ کی سالمیت کو تحفظ فراہم کرنا ہے۔

اتھارٹی کے قائم مقام ڈائریکٹر جنرل مرزوق العتیبی نے ایک سرکلر میں بیان کیا ہے کہ مذکورہ سسٹم کسی بھی ورک پرمٹ کو جاری کرنے سے قبل تعلیمی قابلیت کی تصدیق کرے گا۔

یہ پراسس 3 اہم چیزوں کا معائنہ کرے گا جن میں تعلیمی ڈگری، درخواست دہندگان کی مہارت کا شعبہ اور قابلیت کی منظوری کی حیثیت شامل ہیں۔ یہ اقدام کویت کی اپنی افرادی قوت کو ریگولیٹ کرنے کی کوششوں کا حصہ ہے، تاکہ صرف اہل افراد کی خدمات حاصل کی جاسکیں۔