سپریم کورٹ میں 9 مئی سے متعلق مقدمات سماعت کے لیے مقرر

اسلام آباد:سپریم کورٹ آف پاکستان نے 9 مئی کے واقعات سے متعلق مختلف مقدمات کی سماعت کے لیے تاریخیں مقرر کر دی ہیں۔ تفصیلات کے مطابق پاکستان سپریم کورٹ کی جانب سے جاری شیڈول کے مطابق پاکستان تحریکِ انصاف (پی ٹی آئی) کے رہنماؤں اور کارکنوں کی اپیلوں پر آئندہ ہفتے سماعت ہوگی۔
چیف جسٹس یحییٰ آفریدی کی سربراہی میں تین رکنی بینچ ان مقدمات کی سماعت کرے گا،بینچ پی ٹی آئی کے درجنوں دیگر رہنماؤں اور کارکنوں کی ضمانت منسوخی کی اپیلوں پر بھی غور کرے گا۔
شیڈول کے مطابق عمر سرفراز چیمہ کی جسمانی ریمانڈ نہ دیے جانے کے خلاف اپیل 14 اپریل کو سنی جائے گی، جب کہ سینیٹر اعجاز چوہدری کی ضمانت کی درخواست پر سماعت 15 اپریل کو ہوگی۔
 اسی روز سابق اسپیکر قومی اسمبلی اسد قیصر کی ضمانت منسوخی سے متعلق دائر اپیل پر بھی سماعت ہو گی، جو نگران خیبرپختونخوا حکومت نے 2023 میں دائر کی تھی۔
خیال رہے کہ 9 مئی 2023 کو سابق وزیراعظم اور بانی پی ٹی آئی کی گرفتاری کے بعد ملک بھر میں پرتشدد مظاہرے ہوئے تھے جن کے مقدمات تاحال عدالتوں میں زیر التوا ہیں۔