ایران میں 8 معصوم پاکستانی شہریوں کا قتل ، ایران کی سیکیورٹی پر سوالات

 ایران میں 8 معصوم پاکستانی شہریوں کو بے دردی سے قتل کرنے پرایران کی سیکیورٹی پر بڑے سوالات کھڑے ہوگئے۔

ذرائع کے مطابق ایران کے سرحدی صوبے سیستان کے ضلع مہرستان میں 8 پاکستانی شہریوں کو بے دردی سے قتل کر دیا گیا، قتل کیے گئے معصوم پاکستانی شہری ایران میں روزگار کے سلسلے میں مقیم تھے۔

 اطلاعات کے مطابق حملہ آور رات کے وقت دکان میں داخل ہوئے، مقتولین کے ہاتھ پاؤں باندھے اور انہیں بے دردی سے گولیاں مار کر قتل کر دیا، یہ قتل عام کسی عمومی واردات کا حصہ نہیں بلکہ ایک سوچا سمجھا دہشت گردانہ حملہ تھا۔

اس طرح کے بہیمانہ قتل میں بلوچ دہشتگرد تنظیمیں مُلوث ہیں، اس واقعے سے ثابت ہوتا ہے کہ بلوچ دہشتگرد تنظیموں کی ایران میں محفوظ پناہ گاہیں موجود ہیں۔

جاں بحق کیے گئے 8 افراد میں سے پانچ کی شناخت دلشاد، ان کے بیٹے نعیم اور دیگر تین نوجوانوں جعفر، دانش اور ناصر کے نام سے ہوئی ہے، دلشاد ایک مرمت کی دکان کے مالک تھے، جہاں تمام مقتولین کام اور قیام دونوں کرتے تھے۔