کان کنی و معدنیات کے شعبوں میں امریکی سرمایہ کاری کی حوصلہ افزائی کرے گا، محمد اورنگزیب

اسلام آباد:وزیرِ خزانہ سینیٹر محمد اورنگزیب کا کہنا ہے کہ کان کنی اور معدنیات کے شعبوں میں امریکی سرمایہ کاری کی حوصلہ افزائی کریں گے۔
وزیر خزا نہ محمد اورنگزیب نے عالمی جریدے بلوم برگ کو انٹرویو دیتے ہوئےکہا کہ ہم امریکہ کے ساتھ بڑے پیمانے پر معاشی روابط بڑھانا چاہتے ہیں، ہم تعمیری انداز میں آگے بڑھیں گے اس سلسلے میں جلد ہی ایک سرکاری وفد امریکہ جائے گا۔
اپنے انٹرویو میں ان کامزید کہنا تھا کہ پاکستان امریکہ سے کپاس اور سویا بین خریدنے کا خواہش مند ہے۔
وزیر خزانہ کا مزید کہنا تھا کہ غیر ٹیرف رکاوٹوں کو ختم کرنے پر بھی بات چیت جاری ہے تاکہ امریکی مصنوعات کے لیے پاکستانی منڈیوں کے دروازے کھل سکیں، امریکی مصنوعات پر پاکستان میں کوئی غیر ضروری جانچ پڑتال یا رکاوٹیں ہیں تو اس کا جائزہ لینے کو تیار ہیں،پاکستان میں امریکی فرموں کی سرمایہ کاری کو خوش آمدید کہیں گے۔
وزیرِ خزانہ نے کہا کہ ہم خصوصی طور پر کان کنی اور معدنیات کے نئے شعبوں میں امریکی سرمایہ کاری کی حوصلہ افزائی کریں گے۔
اپنی بات جاری رکھتے ہوئے انہوں نے کہا کہ پاکستان معیشت کو پائیدار ترقی کی راہ پر ڈالنے کا خواہشمند ہے، ترقی کے سفر میں سرمائے کے حصول کے لیے عالمی مالیاتی منڈیوں سے رجوع کریں گے۔
انہوں نے کہا کہ پاکستان کو معاشی اتار چڑھاؤ کے چکر سے باہر لانا ہمارا نصب العین ہے۔ انہوں نے مزید کہا کہ پاکستان حکومت ملک کو مستحکم ترقی کے سفر پر گامزن کرنے کے لیے پرعزم ہے۔