بھارتی اقدامات : قومی سلامتی کمیٹی کا اہم اجلاس کل طلب

نائب وزیراعظم اسحاق ڈار نے اعلان کیا ہے کہ وزیراعظم شہباز شریف نے قومی سلامتی کمیٹی (NSC) کا اہم اجلاس کل طلب کر لیا ہے۔

 اجلاس میں بھارتی جارحانہ اقدامات، بالخصوص مقبوضہ کشمیر میں پہلگام کے مبینہ فالس فلیگ آپریشن کے تناظر میں پاکستان کے ردعمل پر غور کیا جائے گا۔

وزیراعظم شہباز شریف اجلاس کی صدارت کریں گے، جس میں اعلیٰ عسکری قیادت، انٹیلی جنس اداروں کے سربراہان اور اہم وفاقی وزراء شریک ہوں گے۔

نائب وزیراعظم نے کہا کہ قومی سلامتی کمیٹی کا یہ اجلاس انتہائی اہم ہے، جہاں فالس فلیگ آپریشن جیسے حساس معاملے پر ریاستی سطح پر واضح اور مؤثر مؤقف اپنایا جائے گا۔ پاکستان کسی بھی بھارتی مہم جوئی کا بھرپور اور فیصلہ کن جواب دینے کی صلاحیت رکھتا ہے۔

اسحاق ڈار کے مطابق، اجلاس میں ملکی سلامتی کی مجموعی صورتحال، بھارت کی جانب سے حالیہ جنگی جنون پر مبنی اقدامات اور ان سے نمٹنے کے لیے قومی سطح پر جامع حکمت عملی پر مشاورت کی جائے گی۔

اجلاس میں ممکنہ سفارتی، سیکیورٹی اور داخلی اقدامات کی منظوری دیئے جانے کا بھی امکان ہے، تاکہ پاکستان کی خودمختاری اور قومی سلامتی کے تحفظ کو یقینی بنایا جا سکے۔