نادرا نے شناختی کارڈ کےمتعلق نئی ہدایات جاری کر دیں

اسلام آباد:نادرا نے شہریوں کیلئے ایک اہم ہدایت نامہ جاری کرتے ہوئے انہیں جعلی دعوؤں اور دھوکہ دہی سے محتاط رہنے کا مشورہ دیا ہے۔
نیشنل ڈیٹابیس رجسٹریشن اتھارٹی (نادرا)کی جانب سے ہدایت نامہ میں کہا گیا ہے کہ شہری بلا ضرورت شناختی کارڈ فوٹوکاپی نہ کروائیں، شناختی کارڈ بنوانے کیلئے اصل دستاویزات ساتھ لائیں۔
اتھارٹی کی جانب سے کہا گیا ہے کہ بے فارم، رجسٹریشن سرٹیفکیٹ کیلئے فوٹو کاپی لانا ضروری نہیں، بطور ضمانت شناختی کارڈ لینے یا دینے کی قانونی کوئی حیثیت نہیں۔
ہدایت نامے میں مزید کہا گیا ہے کہ دھوکے باز عناصر مالی فائدے، انعامات وغیرہ کا لالچ دیکر شہریوں کی شناختی معلومات یا انگلیوں کے نشانات حاصل کرلیتے ہیں لہٰذا شہریوں کو احتیاطی تدابیر اختیارکرنا ہوں گی۔
نادرا نے عوام سے اپیل کی ہے کہ وہ نادرا سینٹرز پر صرف اصل دستاویزات لے کر آئیں اور کسی بھی قسم کی جعلی یا اضافی دستاویزات سے گریز کریں۔ شہریوں کی سہولت اور سیکیورٹی کو مدنظر رکھتے ہوئے نادرا نے ہدایت نامہ سینٹرز میں نمایاں طور پر آویزاں کر دیا ہے تاکہ ہر فرد بآسانی اسے پڑھ سکے۔
نادرا کا کہنا ہے کہ شناختی معلومات کا تحفظ ہر شہری کی ذمہ داری ہے اور اس حوالے سے ذرا سی لاپرواہی بڑی مشکل کا باعث بن سکتی ہے۔