کاروباری برادری پاک فوج کے ساتھ کھڑی ہے، قائم مقام صدر ایف پی سی سی آئی

کراچی، لاہور اور اسلام آباد میں بیک وقت ہونے والی اعلیٰ سطحی پریس کانفرنس میں پاکستان کی کاروباری برادری نے پاک فوج کے ساتھ بھرپور یکجہتی کا اظہار کیا۔

قائم مقام صدر ایف پی سی سی آئی ثاقب فیاض مگوں نے کہا کہ پاکستانی کاروباری برادری پاک فوج کے شانہ بشانہ کھڑی ہے اور کسی بھی بحران میں فوج کا ساتھ دینے کے لیے تیار ہے۔

ثاقب فیاض مگوں نے بھارت کی جانب سے گیدڑ بھپکیوں پر ردعمل دیتے ہوئے کہا کہ انڈیا کی دھمکیوں سے پاکستان کی کاروباری برادری خوفزدہ نہیں ہے۔

ان کا کہنا تھا کہ پاکستان کی سلامتی کے سامنے ٹریڈ اور معاشی مفادات کوئی حیثیت نہیں رکھتے۔

ڈاکٹر گوہر اعجاز، سابق وفاقی وزیر برائے کامرس نے مزید کہا کہ پاکستان کی دفاعی طاقت کے حوالے سے عالمی سطح پر کوئی شک و شبہ نہیں ہے اور ہم اپنی فوج کی ہر ممکن مدد کریں گے۔

ایف پی سی سی آئی کے پیٹرن ان چیف ایس ایم تنویر نے اس موقع پر کہا کہ پاکستان کی فوج دنیا کی پانچ بہترین افواج میں شامل ہے اور انڈیا کی جارحیت کا بھرپور مقابلہ کرنے کے لیے پاکستان کی افواج ہر وقت تیار ہیں۔

اس کے علاوہ، ایف پی سی سی آئی کے دیگر نمائندوں نے بھی انڈیا کی جارحیت کے خلاف یکجہتی کا اظہار کیا ،  زین افتخار چودھری، ریجنل چیئرمین و نائب صدر ایف پی سی سی آئی نے کہا کہ وہ پاک فوج کے ساتھ ہر قدم پر ہیں۔

جبکہ امان پراچہ، نائب صدر ایف پی سی سی آئی نے بھارت کو دہشتگرد قرار دیتے ہوئے کہا کہ اصل دہشتگرد انڈیا خود ہے۔

عبدالمہیمن خان، ریجنل چیئرمین و نائب صدر ایف پی سی سی آئی نے بھارت کی جارحیت کا مقابلہ کرنے کے عزم کا اظہار کیا اور زبیر طفیل، سابق صدر ایف پی سی سی آئی نے کہا کہ ہم انڈیا کو پاکستان کی معیشت کو تباہ کرنے کی اجازت نہیں دیں گے۔