بھارت نے پاکستان پر کوئی حملہ کیا تو پاکستان اس کی اینٹ سے اینٹ بجا دے گا، فیصل واوڈا

سینیٹر فیصل واوڈا نے پاکستان کی دفاعی صلاحیت پر بھرپور اعتماد کا اظہار کرتے ہوئے کہا کہ اگر بھارت نے پاکستان پر کوئی حملہ کیا تو پاکستان اس کی اینٹ سے اینٹ بجا دے گا۔

انہوں نے یہ بات سینیٹ کے اجلاس میں سندھ طاس معاہدے سے متعلق بیان دیتے ہوئے کہی اور کہا کہ بھارت یکطرفہ طور پر اس معاہدے کو ختم نہیں کر سکتا۔

انہوں نے یہ بھی کہا کہ اگر بھارت نے پانی کی فراہمی کو ایک ہتھیار کے طور پر استعمال کرنے کی کوشش کی تو پاکستان پہلا حملہ کرے گا۔

فیصل واوڈا نے مزید کہا کہ ہم سب ایک ہیں جب بات پاکستان کی ہوتی ہے اور عسکری قیادت ملکی دفاع کے لیے پُرعزم ہے۔

 ان کا کہنا تھا کہ نلکے کا پانی تو ہے نہیں جو آپ موڑ دیں گے، ہم اپنی زمین اور وسائل کا بھرپور دفاع کریں گے۔

فیصل واوڈا نے پاکستان کی مسلح افواج کی صلاحیتوں اور عزم کا ذکر کرتے ہوئے کہا کہ پاکستان کی فوج دنیا کی واحد فوج ہے جس کا نعرہ “اللہ اکبر” ہے۔

انہوں نے اپوزیشن جماعتوں کو بھی ایک پیج پر لانے کی اہمیت پر زور دیتے ہوئے کہا کہ پی ٹی آئی سمیت تمام سیاسی جماعتوں کو ایک ساتھ بٹھایا جائے اور اے پی سی بلائی جائے تاکہ ایک مشترکہ لائحہ عمل مرتب کیا جا سکے۔

انہوں نے سندھ طاس معاہدے کی اہمیت پر بھی زور دیا اور کہا کہ دونوں ممالک نے اس معاہدے پر دستخط کیے ہیں، اس لیے بھارت کو یکطرفہ طور پر اس کو ختم کرنے کا کوئی حق نہیں۔

پاکستانی قوم اپنی فوج کے شانہ بشانہ کھڑی ہے اور ہم کسی کو بھی پاکستان کی طرف میلی آنکھ سے دیکھنے کی اجازت نہیں دیں گے

فیصل واوڈا نے کہا کہ اگر جنگ ہوئی تو یہ صرف پاک بھارت جنگ نہیں بلکہ پورے خطے کی جنگ ہوگی۔ انہوں نے پاک فوج کے نئے آرمی چیف کی صلاحیتوں کا بھی اعتراف کیا اور کہا کہ پاکستان کو ایک محنتی اور باصلاحیت آرمی چیف ملا ہے، جو قوم کی توقعات پر پورا اترے گا۔