جنگی جنون میں مبتلا مودی سرکار نے فواد خان کی فلم ’عبیر گلال‘ کی ریلیز روک دی

ویب ڈیسک : جنگی جنون میں مبتلا مودی حکومت نے پاکستان کے معروف اداکار فواد خان کی بھارتی فلم ”عبیر گلال“ کی نمائش کو بھارت میں کشیدہ سیاسی صورتحال کے باعث غیر معینہ مدت تک کے لیے موخر کر دیا گیا ہے۔
پاکستانی اداکار فواد خان اور بھارتی اداکارہ وانی کپور کی رومانوی فلم "عبیر گلال" کو آج 9 مئی کو بھارت سمیت دنیا بھر میں ریلیز ہونا تھا،تاہم بھارتی جارحیت سے خطے میں پیدا ہونے والی کشیدگی کے باعث فلم کی ریلیز کو غیر معینہ مدت تک کے لیے مؤخر کر دیا گیا۔
فواد خان اور بھارتی اداکارہ وانی کپور کی یہ رومانوی فلم بھارتی سینما میں طویل انتظار کے بعد پیش کی جانی تھی، مگر اب اس کے مستقبل کے حوالے سے کوئی واضح فیصلہ سامنے نہیں آیا ہے۔
بھارتی حکومت کی جانب سے اس فلم پر پابندی اور اس کے متعلق جاری کردہ حکم نامے کے بعد اس کی ریلیز کو تاخیر کا سامنا ہے۔
خیال رہے کہ مودی حکومت نے گزشتہ ماہ پہلگام حملے کے بعد فلم ”عبیر گلال“ پر مکمل پابندی عائد کردی تھی، اس کے ساتھ ہی فلم کے پروموشنل مواد جیسے ٹیزر اور گانے ”رنگ رسیا“ اور ”خدایا عشق“ کو یوٹیوب اور دیگر سوشل میڈیا پلیٹ فارمز سے ہٹا دیا گیا تھا۔
بھارتی وزارت اطلاعات و نشریات نے تمام OTT پلیٹ فارمز، اسٹریمنگ سروسز اور ڈیجیٹل میڈیا کو ایک حکم نامہ بھی جاری کیا تھاجس میں کہا گیا تھا کہ قومی سلامتی کے مفاد میں تمام OTT پلیٹ فارمز اور میڈیا اسٹریمنگ ادارے پاکستانی مواد کو فوری طور پر بند کریں۔
واضح رہے کہ فلم ’عبیر گلال‘ فواد خان کی 9 سال بعد پہلی بھارتی فلم ہے، آخری بار انھوں نے 2016 میں ’اے دل ہے مشکل‘ میں اداکاری کے جوہر دکھائے تھے۔