سینیٹ الیکشن کی تاریخ آتے ہی اپوزیشن قیادت کے رابطے تیز

جی این این کے مطابق سینیٹ الیکشن کی تاریخ آتے ہی اپوزیشن  کے تین بڑے حرکت میں آگئے۔سابق وزیر اعظم نواز شریف اور سابق صدر آصف زرداری کے پی ڈی ایم کے سربراہ مولانا فضل الرحمٰن سے ٹیلی فونک رابطے ہوئے ہیں۔جس میں موجودہ سیاسی صورت حال، سینیٹ انتخابات  کی حکمت عملی  اور لانگ مارچ کو کامیاب بنانے کے لیے مختلف تجاویز پر غور کیا گیا۔نواز شریف نے لانگ مارچ کو کامیاب بنانے کےلیے ن لیگ کے ہر قسم کے تعاون کی یقین دہانی کر ا دی۔ٹیلی فونک رابطے میں مولانا فضل الرحمٰن کا کہنا تھا  کہ ہمیں کرپٹ اور چور کہنے والوں کے اپنے ارکان کرپٹ نکلے۔۔۔تحریک انصاف کے جہاز پر سوار ہونے والوں کی لینڈنگ شروع ہوگئی ہے۔ دونوں رہنماؤں نے ویڈیو سکینڈل کی وجہ سے پیدا صورت حال پر بھی تبادلہ خیال کیا۔

دوسری جانب سابق صدر آصف علی زرداری اور مولانا فضل الرحمان کے درمیان  بھی ٹیلی فونک گفتگو ہوئی، جس میں سینٹ انتخابات میں پی ڈی ایم  امیدواروں کی کامیابی کیلئے کام کرنے پر اتفاق ہوا، ٹیلیفونک گفتگو میں دھرنے  پر بھی مشاورت ہوئی جبکہ لانگ مارچ بھرپور طریقے  سےکرنے اور صدارتی آرڈینس کو تسلیم نہ کرنے پر بھی اتفاق ہوا۔ آصف علی زرداری اور مولانا فضل الرحمٰن نے اسلام آباد میں سرکاری ملازمین پر شیلنگ کے واقعے پر بھی افسوس کا اظہار کیا۔

واضح رہے کہ  الیکشن کمیشن نے سینیٹ انتخابات کا شیڈول جاری کر دیا، ملک بھرمیں سینیٹ انتخابات 3 مارچ کو ہوں گے۔الیکشن کمیشن کی جانب سے جاری شیڈول کے مطابق کاغذات نامزدگی جمع کروانے کے لیے ریٹرننگ آفیسر 11 فروری کو پبلک نوٹس جاری کرے گا۔12 سے 13 فروری تک کاغذات نامزدگی جمع کرائے جا سکیں گے۔ 

الیکشن کمیشن کے امیدواروں کی ابتدائی فہرست 14 فروری کو جاری ہوگی، امیدواروں کی سکرونٹی 15 تا 16 فروری ہوگی جبکہ کاغذات نامزدگی پر اپیلیں 17 تا 18 فروری دائر ہوسکیں گی ۔   الیکشن کمیشن کے مطابق امیدواروں کی حتمی فہرست 21 فروری کو جاری ہوگی، امیدوار اپنے کاغذات نامزدگی 22 فروری تک واپس لے سکیں گے۔