اسکردو :سیر کے لیے آئے گجرات کے 4 دوست گاڑی حادثے میں جاں بحق 

اسکردو: گلگت بلتستان کے علاقے اسکردو میں لاپتہ ہونیوالے گجرات کے 4 سیاحوں کا سراغ مل گیا، چاروں دوست گاڑی حادثے میں جاں بحق ہوگئے۔
 ضلعی انتظامیہ کے مطابق  ایک ہفتہ پہلے لاپتہ گجرات کے 4 سیاحوں کی گاڑی کا سراغ مل گیا، سیاحوں کی گاڑی استک نالہ کے قریب کھائی سے ملی ہے، چاروں سیاح جاں بحق ہوگئے ہیں۔
لاپتہ نوجوانوں کی شناخت سلیمان، واصف شہزاد، عمر احسان اور عثمان کے طور پر ہوئی ہے، جو اپنی سفید رنگ کی ہونڈا سیوک (نمبر 805-ANE) پر چند روز قبل گلگت اور ہنزہ کی سیاحت کے لیے روانہ ہوئے تھے۔ 15 مئی کی رات یہ نوجوان گلگت کے علاقے دنیور سے سکردو کے لیے روانہ ہوئے تھے، جس کے بعد سے ان سے کوئی رابطہ نہ ہو سکا۔
ریسکیو حکام کے مطابق گاڑی گلگت سے اسکردو جانے کے دوران حادثے کا شکار ہوئی، امدادی ٹیمیں جائے حادثہ پہنچ گئیں، گاڑی اور لاشوں کو نکالنے کیلئے کارروائیاں جاری ہیں۔
دوسری جانب مقامی پولیس نے تصدیق کی ہے کہ گنجی پڑی کے مقام پر ان کی گاڑی حادثے کا شکار ملی ہے اور بدقسمتی سے چاروں نوجوان موقع پر ہی جاں بحق ہو گئے۔ 
پولیس نے مزید بتایا کہ گاڑی تک پہنچنے کی کوششیں جاری ہیں تاکہ لاشوں کو نکالا جا سکے اور حادثے کی وجوہات معلوم کی جا سکیں۔