بھارت : کیرالہ کے ساحل کے قریب زہریلا مال بردار جہاز ڈوب گیا

بھارت کی جنوبی ریاست کیرالہ میں اُس وقت ہنگامی صورتحال پیدا ہو گئی جب ایک خطرناک کیمیکلز سے لدا غیر ملکی مال بردار جہاز MSC ELSA 3 بحیرہ عرب میں کوچی کے قریب الٹ کر ڈوب گیا۔ حکام نے ساحلی علاقوں میں الرٹ جاری کر دیا ہے۔

خوش قسمتی سے جہاز پر سوار تمام 24 افراد کو بحفاظت نکال لیا گیا، تاہم 640 میں سے متعدد کنٹینر پانی میں بہتے ہوئے ساحل کی طرف بڑھ رہے ہیں، جس پر شدید تشویش پائی جا رہی ہے۔

حکام کے مطابق جہاز میں موجود 13 کنٹینر زہریلے کیمیکل پر مشتمل تھے، جب کہ 12 کنٹینروں میں کیلشیئم کاربائیڈ تھا، جو پانی سے تفاعل کر کے آتش گیر گیس پیدا کرتا ہے۔

اس کے علاوہ جہاز میں 84.44 میٹرک ٹن ڈیزل اور 367.1 میٹرک ٹن فرنس آئل بھی موجود تھا جو سمندر میں رس چکا ہے۔

یہ حادثہ گزشتہ روز علی الصبح پیش آیا، جب لائبیریا کے پرچم بردار اس جہاز میں اچانک پانی بھر گیا اور وہ 38 ناٹیکل میل دور سمندر میں غرقاب ہو گیا۔