عیدالاضحیٰ :پنجاب میں5 جون سے 11 جون تک دفعہ 144 نافذ

لاہور: پنجاب حکومت نے عیدالاضحیٰ کےپیش نظر صوبے بھر میں5 جون سے 11جون دفعہ 144 نافذ کر دی ہے۔

 محکمہ داخلہ پنجاب کے جاری کردہ احکامات کے مطابق 5 جون سے 11 جون تک متعدد سرگرمیوں پر پابندی عائد کر دی گئی ہے۔

 اس کے علاوہ عید قرباں کےموقع پرپنجاب میں کالعدم تنظیموں کے قربانی کی کھالیں جمع کرنےپرپابندی عائد کر دی گئی ہے۔

دفعہ 144 کے تحت عوامی مقامات پر سری پائے اور دیگر جانوروں کی باقیات جلانا، دریاؤں، نہروں، جھیلوں اور ڈیمز میں نہانا، تیرنا اور کشتی رانی، جانوروں کا فضلہ یا اوجھڑی مین ہول، نالیوں یا نہر میں پھینکنا ،غیر منظور شدہ مقامات پر قربانی کے جانوروں کی خرید و فروخت اور اسلحہ اور گولہ بارود کی نمائش پر دفعہ 144 نافذ کی گئی ہے۔

محکمہ داخلہ کا کہنا ہے کہ یہ فیصلہ انسانی جانوں کے تحفظ، امن و امان کے قیام اور ماحولیاتی بہتری کے پیش نظر کیا گیا ہے۔ مذکورہ سرگرمیاں نہ صرف عوامی تحفظ اور صحت عامہ کیلئے خطرہ ہیں بلکہ شہریوں میں اضطراب کا بھی باعث بنتی ہیں۔

انتظامیہ اور قانون نافذ کرنے والے اداروں کو ان احکامات پر عملدرآمد یقینی بنانے کی ہدایت جاری کر دی گئی ہے۔