9 مئی مقدمات، عمران خان کا پولی گرافک ٹیسٹ کرنے پولیس ٹیم اڈیالہ جیل پہنچ گئی

لاہور پولیس کی ٹیم بانی چیئرمین پی ٹی آئی عمران خان کا پولی گرافک ٹیسٹ کرانے ایک بار پھر اڈیالہ جیل راولپنڈی پہنچ گئی۔

بانی پی ٹی آئی کے پولی گراف ٹیسٹ کے لیے اڈیالہ جیل پہنچنے والی لاہور پولیس کی تفتیشی ٹیم کی سربراہی ڈی ایس پی آصف جاوید کر رہے ہیں، تفتیشی ٹیم میں پنجاب فارنزک یونٹ کے ارکان بھی شامل ہیں۔

ذرائع کا بتانا ہے کہ تفتیشی ٹیم بانی پی ٹی آئی عمران خان سے فوٹو گرامیٹک، پولی گراف اور وائس میچنگ ٹیسٹ کرے گی۔

عمران خان اس سے پہلے تین مرتبہ پولی گراف ٹیسٹ کرانے سے انکار کر چکے ہیں۔

ڈی ایس پی جاوید آصف کا کہنا ہے ملزم ٹیسٹ نہیں کرائے گا تو تفتیش کیسے مکمل ہو سکتی ہے، ٹیسٹ مکمل ہونے پر ہی پتا چلے گا شواہد درست ہیں یا نہیں، ٹیسٹ نہ ہوئے تو تفتیش کا عمل آگے نہیں بڑھے گا۔

یاد رہے کہ پولیس کی تفتیشی ٹیم نے لاہور میں درج 9 مئی کے 11 مقدمات کے حوالے سے عمران خان سے تفتیش کرنی ہے۔