عیدالاضحیٰ پر سندھ کی جیلوں میں قیدیوں کے لیے 120 دن کی معافی کا اعلان

سندھ حکومت نے عیدالاضحیٰ کے موقع پر صوبے کی جیلوں میں قید قیدیوں کے لیے بڑی خوشخبری سنا دی۔ وزیراعلیٰ سندھ کی ہدایت پر عام قیدیوں کے لیے 120 دن کی خصوصی معافی کا اعلان کر دیا گیا ہے۔

محکمہ داخلہ سندھ نے اس حوالے سے باقاعدہ نوٹیفکیشن جاری کر دیا ہے، جس کے مطابق یہ معافی صرف ان قیدیوں کو دی جائے گی جو عام جرائم میں سزا کاٹ رہے ہیں۔

ترجمان کے مطابق، قتل، دہشتگردی، ریپ، اغواء، مالی بدعنوانی، منشیات، فارن ایکٹ، جاسوسی اور سزائے موت کے قیدیوں پر اس معافی کا اطلاق نہیں ہوگا۔

وزیراعلیٰ سندھ کا کہنا ہے کہ یہ اقدام عید کے موقع پر قیدیوں اور ان کے خاندانوں کو ریلیف دینے کے لیے کیا گیا ہے، تاہم صرف ان قیدیوں کو فائدہ دیا جائے گا جو معمولی جرائم میں سزا کاٹ رہے ہیں اور قانون کے تحت معافی کے اہل ہیں۔

یہ فیصلہ جیلوں میں قید ان قیدیوں کے لیے ایک امید کی کرن ہے جو اپنی سزا مکمل کرنے کے قریب ہیں اور اچھے طرز عمل کا مظاہرہ کر چکے ہیں۔