بابر اعظم کا بگ بیش لیگ کے لیے آسٹریلوی فرنچائز سڈنی سکسرز سے باقاعدہ معاہدہ ہو گیا

پاکستان کرکٹ ٹیم کے سابق کپتان اور عالمی شہرت یافتہ بیٹر بابر اعظم نے بگ بیش لیگ کے 15ویں ایڈیشن کے لیے آسٹریلوی فرنچائز سڈنی سکسرز سے باقاعدہ معاہدہ کر لیا ہے۔ بابر اعظم بی بی ایل 15 کے مکمل سیزن کے لیے دستیاب ہوں گے۔

بابر اعظم نے سڈنی سکسرز کا حصہ بننے پر خوشی کا اظہار کرتے ہوئے کہا کہ سڈنی سکسرز جیسی کامیاب ٹیم کا حصہ بننا میرے لیے اعزاز کی بات ہے۔ بی بی ایل میں ڈیبیو کا شدت سے منتظر ہوں۔

بابر نے مزید کہا کہ وہ آسٹریلوی اسٹارز اسٹیو اسمتھ اور جوش ہیزل وُڈ کے ساتھ ڈریسنگ روم شیئر کرنے کے لیے بے حد پرجوش ہیں۔

سڈنی سکسرز کی جنرل منیجر ریچل ہائنز نے بابر اعظم کو خوش آمدید کہتے ہوئے کہا کہ بابر اعظم ایک عالمی معیار کے بلے باز اور ثابت شدہ لیڈر ہیں۔ ان کی شمولیت سکسرز کے لیے قیمتی اضافہ ہوگی۔ ہمیں یقین ہے کہ سکسرز کے مداح بابر کو اپنی ٹیم کی جرسی میں دیکھ کر بے حد خوش ہوں گے۔

بابر اعظم اس سے قبل پی ایس ایل، ایل پی ایل اور ٹی ٹین سمیت مختلف بین الاقوامی لیگز میں شاندار کارکردگی کا مظاہرہ کر چکے ہیں۔