ملک بھر میں شدید گرمی کے بعد بارشوں اور آندھی کی پیشگوئی

اسلام آباد:محکمہ موسمیات نے شدید گرمی کی لہر کے دوران 13 جون سے 16 جون تک مختلف علاقوں میں بارش، گرد آلود ہواؤں اور آندھی کی پیشگوئی کی ہے، جو موسم میں غیر یقینی تبدیلیوں کا پیش خیمہ بن سکتی ہے۔

 محکمہ موسمیات کے مطابق اسلام آباد، راولپنڈی، مری، آزاد کشمیر، خیبرپختونخوا اور بلوچستان کے مختلف علاقوں میں آندھی اور گرج چمک کے ساتھ بارش متوقع ہے۔ 

 محکمہ موسمیات کے مطابق سندھ، جنوبی پنجاب اور بلوچستان کے کئی حصوں میں گرد آلود ہواؤں اور تیز جھکڑوں کا امکان ہے، جو شہریوں کے لیے خطرناک ہو سکتے ہیں۔

محکمہ موسمیات کاکہنا ہے کہ ہفتے کے روز اسلام آباد اور گردونواح میں مطلع جزوی ابرآلود رہنے کے علاوہ تیز ہوائیں/آندھی چلنے اور گرج چمک کے ساتھ چند مقامات پر بارش کی توقع  ہے۔اس دوران بعض مقامات پر ژالہ باری ہو سکتی ہے ۔

دوسری جانب پنجاب ڈیزاسٹر مینجمنٹ اتھارٹی (PDMA) نے متنبہ کیا ہے کہ پنجاب کے مختلف اضلاع میں موسم کی غیر متوقع تبدیلیوں کا خدشہ ہے۔ اضلاع جن میں بارش کے قوی امکانات ہیں ان میں لاہور، فیصل آباد، سیالکوٹ، سرگودھا، میانوالی، ملتان، ڈیرہ غازی خان، بہاولپوراور  بہاولنگر شامل ہیں۔
 ڈی جی پی ڈی ایم اے کے مطابق شہری غیر ضروری سفر سے گریز کریںاور بجلی کے کھمبوں اور کمزور درختوں کے قریب جانے سے پرہیز کریں۔ 
حکام کے مطابق متوقع بارشوں کے بعد ملک بھر میں جاری ہیٹ ویو کی شدت میں کمی آئے گی، جس سے عوام کو کچھ حد تک ریلیف ملے گا۔