ایران کا اسرائیل کے خلاف جوابی کارروائی کا آغاز ، 100 سے زائد بیلسٹک میزائل داغ دیے

تہران: ایران نے اسرائیلی جارحیت پر ردعمل دیتے ہوئے جوابی کارروائی کا آغاز کر تے ہوئے  100 سے زائد بیلسٹک میزائل داغ دیے
غیر ملکی خبر رساں ایجنسی کے مطابق ایران نے اسرائیل پر جوابی حملہ کر دیا،اسرائیلی فوجی ترجمان کی نیوز بریفنگ ایرانی حملے کے باعث اچانک ختم ہو گئی۔
اسرائیلی فوج کا کہنا ہے کہ فضائی دفاعی نظام میزائلوں کو روکنے کے لیے کام کررہا ہےاور شہریوں کو تا حکم ثانی محفوظ مقامات پر رہنے کی ہدایت کی گئی ہے۔
اسرائیلی میڈیا کا کہنا ہے کہ ایران کی جانب سے 100 سے زائد میزائل فائر کیے گئے ہیں، اس وقت اسرائیل بھر میں خطرے کے سائرن بجائے جارہے ہیں۔
ایرانی حملے کے بعد تل ابیب اور مقبوضہ بیت المقدس میں دھماکوں کی آوازیں سنی گئی۔
دوسری جانب ایران نے ملک بھر میں فضائی دفاعی نظام متحرک کر دیا ہے، جوہری تنصیب کے قریب ایک اسرائیلی ڈرون کو بھی مار گرایا۔

غیر ملکی خبر رساں ایجنسی کے مطابق ایران کے دارالحکومت تہران میں فضائی دفاعی نظام فعال ہے، اور شہر کے مرکز میں دھماکوں کی آوازیں سنی گئیں جو آنے والے کسی ممکنہ خطرے کو دفاعی نظام کے ذریعے انٹرسیپٹ کرنے کی کوشش ہے،اسی کے ساتھ ساتھ شہر کے اندر اور مضافاتی علاقوں سے بھی دھماکوں کی آوازیں سنی گئی ہیں۔