ملک کے مختلف شہروں میں تیز ہواؤں کے ساتھ بارش،گرمی کازور ٹوٹ گیا

ویب ڈیسک:ملک کے مختلف شہروں میں تیز ہواؤں کے ساتھ بارش سے گرمی کا زور ٹوٹ گیا ۔

 اسلام آباد، کے پی، پنجاب اور مری سمیت مختلف علاقوں میں بارش اور تیز ہواؤں نے موسم کو خوشگوار بنا دیا، اسلام آباد میں ہلکی بارش سے گرمی کی شدت میں کمی آئی، جبکہ مالم جبہ میں 10 ملی میٹر، کالام میں 8 اور چترال میں 3 ملی میٹر بارش ریکارڈ کی گئی۔

صوبائی دارالحکومت لاہور کے مختلف علاقوں میں تیز ہوائیں چلنے کے باعث موسم خوشگوار ہو گیا اور گرمی کا زور ٹوٹ گیا جس سے  شہریوں کے چہرے خوشی سے کھل اٹھے تاہم لاہور کے مختلف علاقوں میں بجلی کی فراہمی متاثر ہوئی۔

ملکہ کوہسار مری میں بھی موسلادھار بارش  ہوئی ،بارش اور ہواؤں کے باعث گرمی کا زور ٹوٹ گیا، مری میں سیاحوں نے بارش میں مال روڈ پر چہل قدمی کا سلسلہ جاری رکھا۔

تاہم تیز ہواؤں کے باعث مختلف علاقوں میں بجلی کی فراہمی معطل ہوئی۔ شیخوپورہ شہر اور گردو نواح میں تیز ہوائیںچلنےسے گرمی کا زور ٹوٹ گیا۔