اقوام متحدہ میں روس اور چین کی ایران پر اسرائیلی حملوں کی شدید مذمت

نیویارک: اقوام متحدہ کی سلامتی کونسل میں روس اور چین کے سفیروں نےخطاب کرتے ہوئے کہا ہے کہ اسرائیل کی جانب سے ایران کی خودمختاری، سلامتی اور علاقائی سالمیت کی خلاف ورزی کی مذمت کرتے ہیں۔
چینی سفیر
چینی سفیر فو کانگ نے اقوام متحدہ کی سلامتی کونسل میں خطاب میں ایران پر اسرائیلی حملے کی شدیدمذمت کی اور کہا کہ خطے میں کشیدگی بڑھانا کسی کے مفاد میں نہیں ہے۔
چینی سفیر نے مطالبہ کیا کہ اسرائیل کو حملے روکنے چاہئیں، ایران کی جوہری تنصیبات کو بھی نقصان پہنچا ہے،انہوں نے کہا کہ حملوں کے سنگین نتائج ہیں۔

چین کا مزید کہنا تھا کہ خطے میں تناؤ میں اضافہ کسی کے مفاد میں نہیں ہوگا، اسرائیل حملے بند کرکے تمام فریقین بین الاقوامی قانون کی پاسداری کریں، سلامتی کونسل کو کردار ادا کرنا ہوگا۔

فوکانگ نے کہا کہ ایران کے پُرامن جوہری ٹیکنالوجی کے استعمال کے حق کا احترام کیا جانا چاہیے اور جو ممالک اسرائیل پر اثر و رسوخ رکھتے ہیں، انہیں تعمیری کردار ادا کرنا چاہیے۔
 روسی ایلچی
سلامتی کونسل میں روس کے ایلچی نے بھی کہا ہے کہ ایران پر اسرائیل کے حملوں کا کوئی جواز نہیں، اشتعال انگیزی کی حمایت نہیں کی جا سکتی،جنگ کسی کے مفاد میں نہیں۔
 روسی ایلچی نے اجلاس سے خطاب کرتے ہوئے کہا کہ  جارحانہ اقدامات کو قبول کرنا عالمی امن کے لے سنگین خطرہ ہے، عالمی برادری اشتعال انگیزی کے ساتھ کھڑی نہیں ہو سکتی، کشیدگی کم کرنے کیلئے روس سفارتی کوششوں کی حمایت کرے گا۔