ڈی آئی خان:دہشتگردوں کا پولیس پر حملہ،جوابی کارروائی میں دہشتگرد ہلاک، 2 زخمی

ڈی آئی خان: صوبہ خیبر پختونخوا کے ضلع ڈیرہ اسماعیل خان میں تھانہ ہتھالہ کے علاقے ملنگ کے قریب دہشتگردوں نے پولیس اہلکاروں پر فائرنگ کر دی،پو لیس کی جوابی کارروائی میں ایک دہشت گرد ہلاک اور دو زخمی ہو گئے۔

ڈسٹرکٹ پولیس آفیسر(ڈی پی او) سجاد احمد کے مطابق دہشتگردوں نے ٹکواڑہ سے ڈیوٹی ختم کر کے گھروں کو واپس جانے والے پولیس اہلکاروں کو نشانہ بنایا۔ 

انہوں نے بتایا کہ جوابی فائرنگ میں ہلاک ہونے والے دہشتگرد کی شناخت فتح ولد حنان کے نام سے ہوئی ہے،جبکہ زخمی دہشتگردوں کی تلاش کیلئے علاقے میں سرچ آپریشن جاری ہے۔

ڈی پی او کے مطابق ہلاک دہشتگرد کے قبضے سے جدید اسلحہ اور موٹر سائیکل بھی برآمد کر لی گئی ہے۔

پولیس نے علاقے کو گھیرے میں لے کر سیکیورٹی سخت کر دی ہے اور ممکنہ سہولت کاروں کی تلاش جاری ہے۔

انسپکٹر جنرل آف پولیس خیبرپختونخوا ذوالفقار حمید نے ڈیرہ اسماعیل خان پولیس کی کارروائی کو سراہتے ہوئے کہا کہ  فتنۃ الخوارج کا  پیچھا کر کے ٹھکانے لگانے کے لیے پُرعزم ہیں۔