جنگ بندی پر سوالیہ نشان: اسرائیل کے حملے، تہران میں دھماکے

ایران اور اسرائیل کے درمیان جنگ بندی کے اعلان کے باوجود کشیدگی میں کمی نہ آ سکی، اور تہران میں دو دھماکوں کی آوازیں سنائی دی گئی ہیں۔

ایرانی میڈیا کے مطابق یہ دھماکے ممکنہ طور پر اسرائیل کی جانب سے کیے گئے حملوں کے نتیجے میں ہوئے، جن میں ایران کے ریڈار سسٹمز کو نشانہ بنایا گیا ہو سکتا ہے۔ ایرانی سرکاری نشریاتی ادارے نے دعویٰ کیا ہے کہ جنگ بندی کے باوجود اسرائیل نے ایران کے مختلف علاقوں میں حملے کیے ہیں۔

یہ صورتحال ایسے وقت میں سامنے آئی ہے جب کچھ دیر قبل ہی امریکی صدر ڈونلڈ ٹرمپ نے دونوں فریقین کی جانب سے جنگ بندی کی خلاف ورزی پر سخت اظہارِ ناراضی کیا تھا۔ صدر ٹرمپ نے خصوصاً اسرائیل پر تنقید کرتے ہوئے کہا، "اسرائیل نے جنگ بندی پر آمادگی کے فوراً بعد بمباری شروع کر دی۔"

ٹرمپ نے واضح کیا کہ اگر ایران پر دوبارہ بمباری کی گئی تو اسے جنگ بندی کی سنگین خلاف ورزی تصور کیا جائے گا۔ برطانوی خبر رساں ادارے رائٹرز کے مطابق، صدر ٹرمپ نے جنگ بندی کے چند گھنٹوں بعد اس کی خلاف ورزی پر دونوں فریقین کو ذمہ دار قرار دیا، تاہم ان کا لہجہ اسرائیل کے حوالے سے خاصا سخت تھا۔