ایران نےاپنے سے بڑے دشمن کا اچھی طرح سے مقابلہ کیا،وزیر دفاع

اسلام آباد: وزیر دفاع خواجہ آصف نے کہا ہے کہ ایران نے اچھی طرح اپنے سے بڑے دشمن کا مقابلہ کیا۔

تفصیلات کے مطابق قومی اسمبلی میں صحافیوں سے گفتگو کرتے ہوئے خواجہ آصف نے کہا کہ جس طرح ایران نے ڈٹ کر مقابلہ کیا ہے اس پر ایرانی عوام اور حکومت کو خراج تحسین پیش کرتا ہوں۔

وزیر دفاع نےمزید کہا کہ ایران اور اسرائیل کے درمیان سیز فائر ہونا خوش آئند بات ہے،ایران نے نہایت جارحانہ انداز میں اپنا دفاع کیا۔ 

خواجہ آصف نے مزید کہا کہ ایران کے عوام اور ایرانی حکومت کو خراج تحسین پیش کرتا ہوں۔ مسلمانوں کو دو بار فتح نصیب ہوئی۔

خواجہ آصف نے کہا کہ پاکستان کو بھارت اور ایران کو اسرائیل سے فتح نصیب ہوئی۔ اور یہ دو جڑواں فتوحات عالم اسلام کی کامیابی کا ثبوت ہیں،اب دعا ہے اللہ غزہ کے مسلمانوں پر رحم کرے۔
انہوں نے کہا کہ جنگ بندی اس بات کا ثبوت ہے کہ اسرائیلی دعوے بے بنیاد تھے۔

واضح رہے کہ ایران اور اسرائیل کے درمیان 12 روز تک جاری رہنے والی خون ریز جنگ کے خاتمے پر فریقین کا اتفاق ہوگیا ہے۔