وزیراعظم کا سفارتی وفد کے اعزاز میں عشائیہ، بھارتی پروپیگنڈا بے نقاب کرنے پر خراجِ تحسین

وزیراعظم محمد شہباز شریف نے پاکستان کے سفارتی وفد کے اعزاز میں عشائیہ دیا اور عالمی سطح پر بھارتی پروپیگنڈے کو مؤثر انداز میں بے نقاب کرنے پر وفد کو خراجِ تحسین پیش کیا۔

وزیراعظم سے چیئرمین پاکستان پیپلز پارٹی بلاول بھٹو زرداری نے ملاقات کی، جس میں بلاول بھٹو نے وزیراعظم کو وفد کی امریکا، برطانیہ اور یورپ میں اعلیٰ سطحی سفارتی ملاقاتوں سے متعلق تفصیلی بریفنگ دی۔

وزیراعظم شہباز شریف نے کہا کہ عالمی سطح پر پاکستان کے مؤقف کی جس بہترین انداز میں ترجمانی کی گئی، وہ قابلِ ستائش ہے۔ انہوں نے کہا کہ “آپ نے پاکستان کا مقدمہ قومی جذبے سے لڑا اور کامیابی کے ساتھ وطن واپس لوٹے۔”

انہوں نے وفد کو مبارکباد دیتے ہوئے کہا کہ بلاول بھٹو کی قیادت میں وفد نے امریکا، برطانیہ اور یورپی ممالک میں پاکستان کا مؤقف مدلل انداز میں پیش کیا، اور پہلگام واقعے سے لے کر سندھ طاس معاہدے تک تمام حساس معاملات کو درست تناظر میں دنیا کے سامنے رکھا۔

وزیراعظم نے مزید کہا کہ افواجِ پاکستان کی عسکری مہارت اور پیشہ ورانہ حکمت عملی کے باعث بھارت کو اپنے بلاجواز جنگی جنون کی بھاری قیمت چکانی پڑی۔

بجٹ سے متعلق بات کرتے ہوئے وزیراعظم نے کہا کہ مالی سال 2025-26 کے بجٹ میں تنخواہ دار طبقے سمیت تمام طبقات کو ریلیف دینے کی کوشش کی گئی ہے۔
انہوں نے بجٹ سازی کے عمل میں پیپلز پارٹی سمیت تمام اتحادی جماعتوں کے تعاون کا شکریہ ادا کیا اور کہا کہ "مجھے امید ہے کہ آپ سب کی رہنمائی اور تعاون سے ہم درپیش چیلنجز سے کامیابی سے نمٹ سکیں گے۔"