جنرل اسماعیل قانی زندہ اور تہران میں عوام کے درمیان موجود، نیویارک ٹائمز کا دعویٰ غلط ثابت

امریکی اخبار نیویارک ٹائمز کی جانب سے ایرانی القدس فورس کے سربراہ بریگیڈیئر جنرل اسماعیل قانی کی شہادت سے متعلق رپورٹ جھوٹی ثابت ہوئی، جب وہ گزشتہ روز تہران میں ایک عوامی تقریب میں صحیح سلامت شرکت کرتے نظر آئے۔

ترک خبر رساں ادارے "انادولو" کے مطابق، ایرانی نیوز ایجنسی "تسنیم" نے ایک ویڈیو جاری کی ہے جس میں جنرل قانی کو تہران میں منعقد ہونے والے "جشنِ فتح" کے موقع پر عوامی اجتماع میں موجود دیکھا جا سکتا ہے۔

"کمانڈر قانی، آپریشن ’الٰہی فتح‘ کے بعد تہران میں عوامی جشن میں شریک ہوئے۔"

سرکاری چینل "پریس ٹی وی" نے بھی اس ویڈیو کی تصدیق کرتے ہوئے رپورٹ کیا کہ تہران کے عوام نے "صیہونی حکومت کے خلاف کامیابی پر ہونے والے جشن میں القدس فورس کے کمانڈر کا پُرجوش استقبال کیا۔"

اس منظر عام پر آنے والی ویڈیو اور رپورٹنگ نے ان قیاس آرائیوں کو مسترد کر دیا ہے، جن میں کہا جا رہا تھا کہ جنرل قانی اسرائیلی فضائی حملوں میں شہید ہو چکے ہیں۔

یاد رہے کہ رواں ماہ کے آغاز میں نیویارک ٹائمز نے دعویٰ کیا تھا کہ جنرل اسماعیل قانی اسرائیل کے وسیع فضائی حملے میں مارے جانے والے ایرانی اعلیٰ فوجی افسران میں شامل تھے۔ 13 جون کو ہونے والے ان حملوں میں ایران کی جوہری، عسکری اور رہائشی تنصیبات کو نشانہ بنایا گیا تھا، جن کے نتیجے میں 600 سے زائد ایرانی شہری شہید ہوئے، جن میں اعلیٰ افسران، سائنسدان اور عام شہری بھی شامل تھے۔

دوسری جانب، امریکی انٹیلی جنس اداروں کا کہنا ہے کہ ان حملوں کے باوجود ایران کی جوہری صلاحیت کو مکمل طور پر تباہ نہیں کیا جا سکا۔