پاکستان اگلے ماہ اقوام متحدہ کی سلامتی کونسل کی صدارت سنبھالے گا

پاکستان اگلے ماہ جولائی میں اقوام متحدہ کی سلامتی کونسل کی صدارت سنبھالنے جا رہا ہے۔ اس سلسلے میں اقوام متحدہ میں پاکستان کے مستقل مندوب عاصم افتخار احمد نے اقوام متحدہ کے سیکرٹری جنرل انتونیو گوتریس سے نیویارک میں اہم ملاقات کی۔

اقوام متحدہ کے صدر دفتر میں ہونے والی اس ملاقات میں پاکستانی مندوب عاصم افتخار نے سیکرٹری جنرل کو جولائی میں پاکستان کی زیر صدارت سلامتی کونسل کے مجوزہ ”پروگرام آف ورک“ کے حوالے سے تفصیلی طور پر آگاہ کیا۔ انہوں نے یقین دہانی کرائی کہ پاکستان اپنی صدارت کو کھلے، شفاف اور مشاورتی انداز میں انجام دے گا۔

ملاقات کے دوران عالمی سطح پر امن و سلامتی سے متعلق اہم امور پر تفصیلی گفتگو ہوئی۔ خاص طور پر مشرق وسطیٰ کی بگڑتی ہوئی صورتحال، افریقہ، یورپ، ایشیا اور لاطینی امریکا میں جاری پیش رفت، اور اقوام متحدہ کی امن مشنز کے کردار پر تبادلہ خیال کیا گیا۔

عاصم افتخار نے اس موقع پر کہا کہ اقوام متحدہ کے چارٹر کے اصولوں کی پاسداری اور تنازعات کے پرامن حل کے ذریعے عالمی امن و سلامتی کے فروغ کے لیے رکن ممالک کے درمیان مضبوط عزم موجود ہے۔

انہوں نے موجودہ پیچیدہ عالمی چیلنجز سے نمٹنے کے لیے اجتماعی کوششوں کی اہمیت کو اجاگر کرتے ہوئے کثیرالجہتی سفارتکاری اور تنازعات کی روک تھام کے لیے سیکرٹری جنرل کی کوششوں کی بھرپور حمایت کا اعادہ بھی کیا۔

پاکستان کی جانب سے اقوام متحدہ کی سلامتی کونسل کی صدارت سنبھالنا ایک اہم سفارتی پیش رفت تصور کی جا رہی ہے، جو عالمی سطح پر پاکستان کے کردار اور مؤقف کو اجاگر کرنے کا موقع فراہم کرے گی۔