وفاقی حکومت نے عبوری محصولات کے اعداد و شمار جاری کرنے پر پابندی عائد کر دی

وفاقی حکومت نے سالانہ عبوری محصولات کے اعداد و شمار کی اشاعت پر مکمل پابندی عائد کر دی ہے۔

ذرائع کے مطابق، یہ فیصلہ آئی ایم ایف پروگرام کے تحت کیا گیا ہے، جس کے تحت مکمل یا جزوی عبوری مالیاتی اعداد و شمار کسی فرد، ادارے یا میڈیا پلیٹ فارم کے ذریعے شائع نہیں کیے جا سکیں گے۔ ان معلومات کو عوام، میڈیا یا کسی بھی بیرونی فریق کے ساتھ شیئر کرنا ممنوع قرار دیا گیا ہے۔

ذرائع کا کہنا ہے کہ محصولات سے متعلق کسی بھی قسم کا ڈیٹا جاری کرنے کے لیے وزارت خزانہ کی پیشگی اور واضح منظوری ضروری قرار دی گئی ہے۔ بغیر اجازت اعداد و شمار کا اجرا آئی ایم ایف پروگرام کی رازداری کی خلاف ورزی تصور ہوگا، جو نہ صرف پروگرام کے جائزہ عمل کو متاثر کر سکتا ہے بلکہ اس کے مجموعی نتائج پر بھی منفی اثر ڈال سکتا ہے۔

فیصلے کے تحت، تمام عبوری محصولات کے اعداد و شمار کو آئی ایم ایف کے پہلے جائزے کی تکمیل تک خفیہ رکھا جائے گا۔ منظور شدہ اعداد و شمار بعد ازاں باضابطہ ذرائع سے عوام کے ساتھ شیئر کیے جائیں گے۔