بنگلہ دیشی عوام پاکستان کو بھارت سے زیادہ قریبی دوست سمجھتے ہیں: گیلپ پاکستان سروے

گیلپ پاکستان کے حالیہ سروے میں حیران کن رجحانات سامنے آئے ہیں، جن کے مطابق بنگلہ دیش کے شہریوں کی ایک بڑی تعداد بھارت کے مقابلے میں پاکستان کو زیادہ قریبی اور مخلص دوست تصور کرتی ہے۔

سروے نتائج کے مطابق، 46 فیصد بنگلہ دیشی شہریوں نے پاکستان کو اپنا قریبی دوست قرار دیا، جب کہ صرف 11 فیصد افراد نے بھارت کو دوست ملک کہا۔ دلچسپ بات یہ ہے کہ 47 فیصد نے بھارت کو دشمن تصور کیا، جو دونوں ممالک کے درمیان موجود کشیدگی کو نمایاں کرتا ہے۔

حالیہ پاک-بھارت تنازع کے تناظر میں بھی سروے کے نتائج قابل توجہ ہیں۔ 54 فیصد بنگلہ دیشیوں نے پاکستان کی حمایت کی، جبکہ بھارت کے حق میں صرف 9 فیصد افراد سامنے آئے۔ مزید برآں، 46 فیصد شہریوں نے پاکستان کو تنازع کا فاتح قرار دیا، جب کہ بھارت کو صرف 6 فیصد افراد نے برتری دی۔

سروے میں یہ بات بھی سامنے آئی ہے کہ پاکستان، بنگلہ دیش کے دیگر دوست ممالک کی فہرست میں سرفہرست ہے، جو دونوں مسلم ممالک کے درمیان بڑھتے ہوئے تعلقات اور باہمی اعتماد کی عکاسی کرتا ہے۔