مخصوص نشستوں سے متعلق آئینی بینچ کے فیصلے پر پی ٹی آئی کا ردعمل آگیا

اسلام آباد: سپریم کورٹ آئینی بینچ کے مخصوص نشستوں کے نظر ثانی کیس کے آج سنائے گئے فیصلے پر پاکستان تحریک انصاف (پی ٹی آئی) کا ردعمل آ گیا۔

تفصیلات کے مطابق مخصوص نشستوں کے نظر ثانی کیس میں سپریم کورٹ کے آئینی بینچ کے فیصلے پر ردعمل دیتے ہوئے پی ٹی آئی نے کہا کہ آج ایک بار پھر پاکستان تحریک انصاف کے آئینی حق پر ڈاکا ڈال دیا گیا۔

ترجمان پی ٹی آئی کی جانب سے جاری بیان میں کہا گیا ہے کہ سپریم کورٹ کے گزشتہ سال 12 جولائی کے فیصلے کے تحت مخصوص نشستوں کا آئینی استحقاق تسلیم کیا گیا تھایہ وہ وقت تھا جب عدالت نے آئین کی روشنی میں فیصلہ دیا تھا جب کہ آج ایک ایسا فیصلہ آیا ہے جس نے انصاف کی روح کو کچلا ہے۔

ترجمان پی ٹی آئی نے کہا کہ عوام کے ووٹ، نمائندگی اور اعتماد کو بھی روند ڈالا ہے، یہ نظرثانی کیس مہینوں عدالتوں میں چلتا رہا۔

جاری بیان میں مزید کہا گیا کہ تحریک انصاف نے ہر قانونی دروازہ کھٹکھٹایا، ہر دلیل پیش کی، ہر آئینی نکتہ اٹھایا، ہماری مخصوص نشستوں کو ”مالِ غنیمت“ کی طرح بانٹا گیا۔

ترجمان پی ٹی آئی کا مزید کہنا تھا کہ سیٹیں ان جماعتوں کو بانٹیں جنہیں عوام نے مسترد کیا، یہ فیصلہ پاکستان کی آئینی تاریخ کا ایک سیاہ ترین دن ہے، ریاست اب عوامی، آئینی یا جمہوری نہیں رہی۔