تیونس کی لڑکی کو پاکستانی شوہر کی طلاق، وطن واپسی کے لیے وزارت داخلہ کا نوٹس

وزارت داخلہ نے تیونس سے تعلق رکھنے والی 19 سالہ غیر ملکی لڑکی سندا ایاری کو فوری ایگزٹ پرمٹ جاری کرنے کی پیشکش کر دی ہے۔ وفاقی وزیر داخلہ محسن نقوی نے اس معاملے کا نوٹس لیتے ہوئے ویزا حکام کو ہدایت دی ہے کہ وہ سندا ایاری کے تمام دستاویزات کا جائزہ لیں۔

وزارت کے مطابق، سندا کو آن لائن ایگزٹ پرمٹ کی درخواست دینے کی ہدایت کی گئی ہے تاکہ وہ قانونی طور پر وطن واپس جا سکے۔

خاتون نے کراچی کے لیاقت آباد ویمن پولیس اسٹیشن میں رپورٹ درج کروائی تھی، جس میں بتایا کہ ان کا نکاح نیا آباد لیاری کے رہائشی محمد عامر سے ہوا تھا۔ دونوں کی سوشل میڈیا پر دوستی ہوئی، جس کے بعد سندا 28 نومبر 2024 کو پاکستانی ویزا لے کر کراچی پہنچی۔ اگلے ہی روز عامر کے اہلِ خانہ نے ایک سادہ تقریب میں دونوں کی شادی کروائی، جس کا باقاعدہ اندراج 6 مارچ کو یونین کونسل بغدادی میں کیا گیا۔

پولیس رپورٹ کے مطابق، دونوں کے درمیان کچھ ماہ بعد اختلافات پیدا ہوئے جس کے نتیجے میں عامر نے طلاق دے دی۔ خاتون کا پاکستانی ویزا فروری 2025 میں ختم ہو چکا ہے اور اب وہ اپنے وطن واپس جانا چاہتی ہے۔

ویمن پولیس اسٹیشن کے مطابق، پولیس نے سندا کو عارضی پناہ دے رکھی ہے اور اس کی ضروریات کا خیال رکھا جا رہا ہے۔