پاکستان کے ڈیفالٹ رسک میں نمایاں کمی، عالمی سرمایہ کاروں کا اعتماد بحال ہونے لگا

 عالمی مالیاتی جائزوں کے مطابق پاکستان کے ڈیفالٹ رسک میں نمایاں کمی ریکارڈ کی گئی ہے، جو ملکی معیشت میں بہتری اور معاشی پالیسیوں کی درست سمت کا مظہر ہے۔

بین الاقوامی ادارے بلوم برگ کی رپورٹ کے مطابق پاکستان کا ڈیفالٹ کا امکان 59 فیصد سے گھٹ کر 47 فیصد رہ گیا ہے، جو ایک سال کے دوران واضح بہتری کو ظاہر کرتا ہے۔ رپورٹ میں کہا گیا ہے کہ یہ کمی عالمی مالیاتی اداروں کی جانب سے کریڈٹ آؤٹ لک میں بہتری، معاشی اصلاحات اور استحکام کی بنیاد پر ممکن ہوئی ہے۔

بلوم برگ کے مطابق یہ مثبت پیش رفت سرمایہ کاروں کے بڑھتے ہوئے اعتماد کی عکاسی کرتی ہے اور پاکستانی معیشت کے مستقبل سے متعلق مثبت رجحان کو ظاہر کرتی ہے۔

پاکستان دنیا میں ڈیفالٹ رسک میں سب سے نمایاں بہتری دکھانے والا ملک وزارت خزانہ کے مشیر خرم شہزاد نے اپنے بیان میں کہا ہے کہ "بلوم برگ انٹیلیجنس کے مطابق پاکستان نے خودمختار ڈیفالٹ رسک میں دنیا بھر کے مقابلے میں سب سے نمایاں بہتری دکھائی ہے، جو کہ ایک قابلِ تحسین سنگِ میل ہے۔

انہوں نے مزید کہا ڈیفالٹ امکان کا 59 سے 47 فیصد پر آنا اس بات کا ثبوت ہے کہ عالمی سرمایہ کاروں کا اعتماد بحال ہو رہا ہے اور حکومت کی معاشی حکمت عملی درست سمت میں آگے بڑھ رہی ہے۔