خیبرپختونخوا میں حالیہ بارشوں کے باعث ہونے والے نقصانات کی رپورٹ جاری

پاکستان ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا میں حالیہ بارشوں کے باعث ہونے والے نقصانات کی رپورٹ جاری کر دی، بارش، سیلاب، فلیش فلڈ اور لینڈ سلائیڈنگ کے باعث صوبے میں جانی و مالی نقصانات ہوئے۔

رپورٹ کے مطابق گزشتہ 48 گھنٹے کے دوران مختلف حادثات کے نتیجے میں 19 افراد جاں بحق اور 6 زخمی ہوئے۔ جاں بحق افراد میں 6 مرد، 5 خواتین اور 8 بچے شامل ہیں۔

پی ڈی ایم اے کے مطابق زخمیوں میں 3 مرد اور 3 خواتین شامل ہیں۔ جبکہ بارش سے مجموعی طور پر 56 گھروں کو نقصان پہنچا، بارش کے باعث حادثات سوات، ایبٹ آباد، چارسدہ، ملاکنڈ، شانگلہ، دیر لوئر اور تورغر میں پیش آئے۔

پی ڈی ایم اے کی جانب سے بارشوں کا سلسلہ یکم جولائی تک جاری رہنے کا الرٹ تمام متعلقہ اضلاع کو پہلے ہی جاری کیا جاچکا ہے۔ خیبرپختونخوا کے بیشتراضلاع میں اگلے 48 گھنٹوں کے دوران مزید بارشوں کی پیشگوئی کردی گئی ہے۔

حکام نے قومی و صوبائی شاہراہوں پر مسافروں کو محتاط رہنے اور متبادل راستے اختیار کرنے کی ہدایت کی ہے، عوام سے گزارش ہے کہ آندھی، ژالہ باری اور گرج چمک کے دوران محفوظ جگہوں پر پناہ لیں۔

پی ڈی ایم اے کے مطابق خیبرپختونخوا کےبیشتراضلاع میں اگلے24 تا48 گھنٹوں کے دوران مزید بارشوں کی پیشگوئی ہے، سوات، چترال، ایبٹ آباد، مانسہرہ، پشاور، بنوں اور وزیرستان میں سیلابی صورتحال کا خدشہ ہے

دریائے سوات، پنجکوڑا اور معاون ندیوں میں پانی کی سطح میں مزید اضافہ متوقع ہے، دریائے کابل میں آیندہ 48 گھنٹوں میں کم درجے کے سیلاب کی صورتحال پیدا ہونے کا امکان ہے۔

پی ڈی ایم اے کے مطابق تمام متعلقہ اداروں کو ہدایت ہے کہ متبادل روٹس اور ٹریفک کے بہاؤ کو مؤثر بنایا جائے، پی ڈی ایم اے کا ایمرجنسی اپریشن سنٹر مکمل طور پر فعال ہے، عوام کسی بھی ناخوشگوار واقعے کی اطلاع 1700 پردیں۔