پی ایس ایل 10 کا بڑا کارنامہ: براڈکاسٹ اور لائیو اسٹریمنگ ویور شپ کے تمام ریکارڈز ٹوٹ گئے

پاکستان سپر لیگ (پی ایس ایل) کے دسویں ایڈیشن نے براڈکاسٹ ویور شپ اور لائیو اسٹریمنگ میں نئے ریکارڈ قائم کر دیے ہیں، جس نے ایونٹ کی مقبولیت میں بے پناہ اضافہ ثابت کر دیا ہے۔

لاہور میں منعقدہ ایک اجلاس کے دوران پی ایس ایل انتظامیہ نے اسٹیک ہولڈرز کو مختلف پہلوؤں پر تفصیلی بریفنگ دی۔ بریفنگ کے مطابق، پی ایس ایل 10 سے 50 کروڑ روپے سے زائد مالیت کی گیٹ منی حاصل ہوئی، جو شائقین کی بھرپور شرکت کا ثبوت ہے۔

براڈکاسٹ ویور شپ کے حوالے سے بتایا گیا کہ اس سیزن میں اوسط ٹی وی ریٹنگ 8.5 فیصد رہی، جو گزشتہ سیزن کے مقابلے میں نمایاں طور پر زیادہ ہے۔
پشاور زلمی سب سے زیادہ دیکھی جانے والی ٹیم رہی، جب کہ مجموعی کارکردگی کے لحاظ سے لاہور قلندرز نے سبقت حاصل کی۔

پی ایس ایل 10 میں لائیو اسٹریمنگ میں 647 فیصد اضافہ ریکارڈ کیا گیا۔
پی ایس ایل 9 میں لائیو اسٹریمنگ ویوز 455 ملین تھے، جب کہ پی ایس ایل 10 میں یہ تعداد 3.4 بلین تک پہنچ گئی۔
ایونٹ کا فائنل میچ سب سے زیادہ دیکھا جانے والا مقابلہ رہا۔

اعداد و شمار کے مطابق، لاہور قلندرز کے میچز کی ویورشپ 1.4 بلین تک پہنچی۔ شہری علاقوں میں لائیو اسٹریمنگ کا تناسب 53 فیصد جبکہ دیہی علاقوں میں 47 فیصد رہا۔ ناظرین میں 67 فیصد مرد اور 33 فیصد خواتین شامل تھیں، جو لیگ کی وسیع تر رسائی کو ظاہر کرتا ہے۔

اس موقع پر چیئرمین پی سی بی محسن نقوی نے کہا کہ پی ایس ایل صرف ایک کرکٹ ٹورنامنٹ نہیں، بلکہ امید اور یکجہتی کی علامت بن چکا ہے۔ انہوں نے کہا کہ لیگ نے عالمی معیار کی کرکٹ اور ناقابلِ فراموش لمحات فراہم کیے ہیں، اور اسے مزید مستحکم اور بین الاقوامی سطح پر مؤثر بنایا جائے گا۔

پی ایس ایل کے سی ای او سلمان نصیر نے کہا کہ پی ایس ایل 10 ایک روایتی ایڈیشن نہیں بلکہ ایک قومی جشن تھا۔ ان کے مطابق، پی ایس ایل اب ایک تحریک کی شکل اختیار کر چکی ہے، جو شائقین کرکٹ کو ایک دوسرے سے جوڑتی ہے۔