بھارت: پوجا سے واپس لوٹنے والے یاتریوں کی بس کو خوفناک حادثہ، 18 افرادجاں بحق

جے پور: بھارتی ریاست راجستھان کے ضلع فلوڈی میںمندر سے پوجا کر کے لوٹنے والے ہندو یاتریوں کی بس کو خوفناک حادثہ پیش آیا ہے جس کے نتیجے میں کم از کم  18 افراد جاںبحق جبکہ تین زخمی ہوگئے۔

بھارتی میڈیا کے مطابق یہ افسوسناک حادثہ مٹوڈا گاؤں کے قریب بھارت مالا ہائی وے پر پیش آیا، جو ریاستی دارالحکومت جے پور سے تقریباً 400 کلومیٹر دور واقع ہے۔

 پولیس کے مطابق حادثہ اس وقت پیش آیا جب ایک مسافر بس نے سڑک کے کنارے کھڑے ٹرالر سے ٹکرائی،حادثے میں جاں بحق ہونے والے تمام افراد جودھپور کے سورساگر علاقے کے رہائشی تھے جو پوجا کرنے کے بعد واپس اپنے گھروں کو جا رہے تھے۔

دوسری جانب ریاست راجستھان کے وزیراعلیٰ بھجن لال شرما نے حادثے پر گہرے دکھ اور افسوس کا اظہار کیا ہے۔

انہوں نے سوشل میڈیا پلیٹ فارم ایکس (سابقہ ٹوئٹر) پر اپنے پیغام میں کہا کہ، فلوڈی کے مٹوڈا علاقے میں پیش آنے والا یہ سڑک حادثہ انتہائی المناک اور دل دہلا دینے والا ہے۔

انہوں نے ضلعی انتظامیہ کو ہدایت کی کہ متاثرہ خاندانوں کو ہر ممکن مدد فراہم کی جائے اور زخمیوں کو بہترین طبی سہولیات فراہم کی جائیں،میں زخمیوں کی جلد صحتیابی کے لیے دعا گو ہوں۔

ایکس پر جاری بیان میں انہوں نےمزید لکھا کہ میری ہمدردیاں لواحقین کے ساتھ ہیں۔