چارسدہ: نامعلوم افراد کی فائرنگ سے جے یو آئی کے رہنما مولانا عبدالسلام جاں بحق

چارسدہ :صوبہ خیبر پختونخوا کے ضلع چارسدہ میں نامعلوم ملزمان کی فائرنگ سے جمعیت علمائے اسلام (جے یو آئی) کے سینئر رہنما مولانا عبدالسلام جاں بحق ہو گئے۔

پولیس کے مطابق چارسدہ کے تھانہ مندنی کی حدود میں نامعلوم موٹرسائیکل سواروں نے مولانا عبدالسلام کی کار پر فائرنگ کی، جس سے کار میں موجود مولانا عبدالسلام جاں بحق ہو گئے۔

حکام کا کہنا ہے کہ واقعہ کی اطلاع ملتے ہی ریسکیو ٹیمیں اور پولیس کی بھاری نفری موقع پر پہنچ گئی، لاش کو پوسٹ مارٹم کیلئے سول ہسپتال جمال آباد منتقل کر دیا گیاہے۔

واقعے سے متعلق پولیس حکام کا کہنا ہےکہ پولیس نے مختلف پہلوؤں سے تفتیش شروع کر دی اور ملزمان کی تلاش جاری ہے۔

خیال رہے کہ مقتول مولانا عبدالسلام چارسدہ کی تحصیل تنگی اینگر باڑی بند کے ایک مدرسہ کے مہتتم تھے۔ اور جے یو آئی کی صوبائی شوریٰ کے رکن تھے۔

دوسری جانب مولانا عبدالسلام کے انتقال پر جے یو آئی کے رہنماؤں و دیگر اعلیٰ حکام کی جانب سے گہرے دکھ اور افسوس کا اظہار کیا گیااوران کے بلندی درجات اور اہل خانہ کے لیے صبر جمیل کی دعا کی گئی۔