مولانا کا ملکی سیاست میں اہم کردارہے، 27ویں ترمیم بڑی آسانی سےپاس ہو جائے گی،فیصل واوڈا

اسلام آباد: سینئر سیاسی رہنما وسینیٹر فیصل واوڈا نے وفاقی دارالحکومت میں سربراہ جےیو آئی مولانا فضل الرحمان نے ملاقات کی،جس میں مجوزہ 27 ویں آئینی ترمیم سمیت ملکی سیاست کے مختلف امور پر تبادلہ خیال کیا گیا۔

تفصیلات کے مطابق ملاقات کے بعد میڈیا سے گفتگو کرتے ہوئے فیصل واوڈا نے کہا کہ مولانا فضل الرحمان کا ملکی سیاست میں اہم کردارہے، مجھےتو27ویں ترمیم بڑی آسانی سےپاس ہوتی نظرآرہی ہے۔

میڈیا سے گفتگو کرتے ہوئےاُنہوں نے کہا کہ تحریک انصاف کواعتماد میں لینا چاہیے، وزیراعلیٰ خیبرپختونخوا سہیل آفریدی کوخوش آمدید کہتےہیں، اگر مولا جٹ کی سیاست کریں گے تو پھینٹا بھی لگےگا اور گورنرراج کا بھی آپشن ہے۔

دورانِ گفتگو فیصل واوڈا کا کہنا تھا کہ پاکستان کی بقا کےلیےمولانا فضل الرحمان کا ساتھ ضروری ہے۔

سینئر سیاسی رہنما کا کہنا تھا کہ پیپلزپارٹی جمہوری پارٹی نظام کوڈی ریل نہیں ہونے دے گی، اٹھارہویں ترمیم کوختم نہیں کیا جارہا،مولانا کےبحاف پرکچھ نہیں کہہ سکتا اپنا فیصلہ وہ خود کریں گے۔

فیصل واوڈا نے کہا کہ اپنی افواج کوانرجی دینےکی ضرورت ہے، دفاع کو مضبوط کرنے کے لیے جو ترامیم چاہیے وہ ہو جائیں گی، پاکستان ہمیشہ زندہ باد رہےگا، کوئی ابہام نہیں ہونا چاہیے۔

میڈیا سے گفتگو میں ان کا مزید کہنا تھا کہ جنگ صرف زمین، سمندر اور فضا میں نہیں ہوتی، سائبرجنگ، بیانیےکی جنگ اورمعیشت کی جنگ بھی ہوتی ہے، اپنی افواج کو مضبوط کریں گے،افواج مضبوط ہوگی تو ملک کا دفاع بھی مضبوط ہوگا۔