ملک بھر میں خسرہ،روبیلا اور پولیو سے بچاؤ کی قومی ویکسی نیشن مہم جاری

اسلام آباد:ملک بھر میں خسرہ، روبیلا اور پولیو سے بچاؤ کی قومی ویکسی نیشن مہم 17 تا 29 نومبر جاری ہے۔

قومی ایمرجنسی آپریشن سینٹر (این ای او سی)کی جانب سے جاری بیان کے مطابق مہم کے دوران 3 کروڑ 54 لاکھ بچوں کو خسرہ اور روبیلا سے بچاؤ کی ویکسین دی جا رہی ہے۔

ترجمان کے مطابق ملک بھر کے 90 ہائی رسک اضلاع میں رواں ہفتے 2 کروڑ 33 لاکھ بچوں کو پولیو سے بچاؤ  کے قطرے پلائے جا رہے ہیں۔

ترجمان نے بتایا کہ ویکسین سرکاری صحت کے مراکز، سکولوں، مدارس اور عارضی ویکسی نیشن مراکز پر فراہم کی جا رہی ہے، ابتدائی سات روز میں میں 1 کروڑ 4 لاکھ سے زائد بچوں کو پولیو کے قطرے پلائے گئے۔

ترجمان نے مزید بتایا کہ اِسی طرح پنجاب میں 31 لاکھ 54 ہزار ، سندھ میں 35 لاکھ 22 ہزار سے زائد اور خیبر پختونخوا میں 24 لاکھ 63 ہزار سے زائد، بلوچستان میں 10 لاکھ سے زائد بچوں کو پولیو سے بچاؤ کے قطرے پلائے گئے۔

علاوہ ازیں ترجمان کا کہنا تھا کہ اسلام آباد میں 1 لاکھ 92 ہزار سے زائد بچوں کو اور گلگت بلتستان میں 77 ہزار سے زائد بچوں کوانسداد پولیو  کے قطرے پلائے گئے۔

حکام نے والدین سے اپیل ہے کہ وہ ہر پولیو مہم میں اپنے بچوں کو پولیو سے بچائو کے قطرے لازمی پلوائیں۔پولیو کا خاتمہ ہم سب کی مشترکہ قومی ذمہ داری ہے۔

ترجمان کے مطابق قومی ویکسی نیشن مہم 29 نومبر تک جاری رہے گی۔سال 2025 کی آخری قومی انسداد پولیو مہم کا انعقاد 15 تا 21 دسمبر کیا جائے گا۔