اداکارہ کی پراسرار موت: عدالت میں قتل کا مقدمہ درج کرنے کی درخواست

اداکارہ حمیرا اصغر کی موت کو قتل قرار دیتے ہوئے ایک شہری نے مقدمہ درج کرانے کے لیے عدالت سے رجوع کرلیا ہے۔ سٹی کورٹ میں دائر درخواست میں مؤقف اختیار کیا گیا ہے کہ اداکارہ کی موت طبعی نہیں بلکہ انہیں قتل کیا گیا ہے۔

شہری شاہ ذیب سہیل کی جانب سے دائر کردہ درخواست میں کہا گیا ہے کہ حمیرا اصغر علی، جو شوبز انڈسٹری کی ایک بااثر شخصیت تھیں، ان کی موت نے عوامی سطح پر تشویش پیدا کر دی ہے۔ ان کا کہنا ہے کہ واقعے کی ویڈیو سے بظاہر یہ محسوس ہوتا ہے کہ اداکارہ کو قتل کیا گیا ہے۔

درخواست گزار نے مزید کہا کہ اداکارہ کے خاندان کی جانب سے لاتعلقی کا اظہار بھی حیرت کا باعث ہے، جو معاملے کو مزید مشکوک بناتا ہے۔

درخواست میں استدعا کی گئی ہے کہ عدالت مرحومہ کے اہلِ خانہ کو بھی مقدمے میں نامزد کرکے واقعے کی مکمل اور شفاف تفتیش کا حکم دے۔ ساتھ ہی ایس ایس پی ساؤتھ اور ایس ایچ او گزری کو فریق بنایا گیا ہے۔

یاد رہے کہ کچھ روز قبل کراچی کے علاقے ڈیفنس میں واقع ایک فلیٹ سے اداکارہ حمیرا اصغر کی لاش برآمد ہوئی تھی۔ پولیس فلیٹ کے مالک کی شکایت پر عدالتی حکم کے تحت جب فلیٹ خالی کرانے پہنچی تو دروازہ توڑ کر اندر داخل ہونے پر لاش ملی۔

ڈی آئی جی ساؤتھ سید اسد رضا کے مطابق، دروازہ کھٹکھٹانے پر اندر سے کوئی جواب نہیں آیا جس کے بعد پولیس نے زبردستی داخل ہو کر لاش برآمد کی۔

پوسٹ مارٹم کرنے والی پولیس سرجن ڈاکٹر سمعیہ سید کے مطابق، لاش اس قدر گل چکی تھی کہ فوری طور پر موت کی وجہ کا تعین ممکن نہ ہو سکا۔ پولیس اس وقت مختلف پہلوؤں سے اداکارہ کی موت کی تحقیقات جاری رکھے ہوئے ہے۔