اداکارہ حمیرا اصغر کے اہل خانہ قانونی کارروائی کے بعد میت لے کر لاہور روانہ

ڈیفنس فیز 6 میں فلیٹ میں مردہ پائی گئی اداکارہ و ماڈل حمیرا اصغر کی لاش ورثا کے حوالے کردی گئی جس کے بعد وہ مرحومہ کی میت لے کر لاہور روانہ ہوگئے۔

اداکارہ کے بھائی نے میڈیا سے گفتگو میں بتایا کہ ان کا تقریبا 10 ماہ قبل حمیرا سے رابطہ ہوا تھا۔ انہوں نے بتایا کہ ایک قریبی عزیزہ کے انتقال کی وجہ سے وہ فوری طور پر کراچی نہیں پہنچ سکے جس کی وجہ سے لاش کی وصولی میں تاخیر ہوئی، ہم مسلسل پولیس سے رابطے میں تھے اور قانون کے مطابق تمام کارروائی مکمل کروائی گئی ہے۔ اہل خانہ کا کہنا ہے کہ حمیرا کی تدفین لاہور میں کی جائے گی۔

دوسری جانب پولیس حکام کا کہنا ہے کہ واقعے کی تحقیقات جاری ہیں اور موت کی وجوہات جاننے کے لیے مختلف پہلوؤں کو مدِنظر رکھا جا رہا ہے۔ سی ڈی آر میں آنے والے کیب ڈرائیور اور دیگر افراد سے بھی تفتیش کی جائے گی۔

تفتیشی ذرائع کے مطابق اداکارہ کے موبائل فون کا ریکارڈ حاصل کر لیا گیا ہے اور ان تمام افراد سے پوچھ گچھ کی جا رہی ہے جن سے انہوں نے آخری مرتبہ رابطہ کیا تھا۔

یاد رہے کہ حمیرا اصغر کی لاش 8 جولائی کو اتحاد کمرشل کے ایک فلیٹ سے اس وقت ملی جب کرائے کی عدم ادائیگی پر مالک مکان کے عدالت پہنچنے پر عدالتی بیلف ان کے گھر پہنچا اور فلیٹ کا دروازہ نہ کھولنے پر دروازہ توڑا گیا تو اداکارہ کی لاش برآمد ہوئی۔