سپریم جوڈیشل کونسل اجلاس: ججز کے خلاف19 شکایات کو متفقہ طور پر خارج کر دیا گیا

اسلام آباد: سپریم جوڈیشل کونسل کے اجلاس میں ججز کے خلاف 24 میں سے 19 شکایات کو متفقہ طور پر خارج کر دیا جبکہ 5 شکایات کو مؤخر کر دیا گیا۔

تفصیلات کے مطابق چیف جسٹس پاکستان یحییٰ آفریدی کی زیر صدارت سپریم جوڈیشل کونسل کا اجلاس دو گھنٹے تک جاری رہا،جس کا اعلامیہ جاری کر دیا گیا۔

 اجلاس میں جسٹس منصور علی شاہ، منیب اختر، عالیہ نیلم اور جنید غفار نے شرکت کی۔

چیف جسٹس کی زیر صدارت ہونے والے اجلاس میں ججز کے خلاف موصول ہونے والی شکایات، ضابطہ اخلاق میں ترامیم، اور انکوائری کے طریقہ کار پر تفصیلی غور کیا گیا۔

 اجلاس کے دوران یہ تجویز زیر بحث آئی کہ جن ججز کے خلاف شکایات نمٹا دی جائیں، ان کے نام پبلک کیے جائیں، تاہم سپریم جوڈیشل کونسل نے یہ تجویز مسترد کر دی۔

اجلاس کے اعلامیہ کے مطابق سپریم جوڈیشل کونسل سروس رولز 2025 کا مسودہ منظور کر لیا گیا، اجلاس میں ضابطہ اخلاق میں ترامیم پر مزید قانونی غور کی ضرورت پر زور دیا گیا۔

اعلامیہ میں کہا گیا کہ انکوائری کے طریقہ کار پر بھی مزید مشاورت کی جائے گی، آرٹیکل 209 کے تحت دائر 24 شکایات کا جائزہ لیا گیا، 19 شکایات کو متفقہ طور پر خارج جبکہ 5 شکایات کو مؤخر کر دیا گیا۔