تحریک انصاف کو مذاکرات کی میز پر لوٹنا ہوگا، اسٹیبلشمنٹ کا کوئی کردار نہیں: طلال چوہدری

وزیر مملکت برائے داخلہ طلال چوہدری نے کہا ہے کہ تحریک انصاف کو اگر سیاسی عمل میں دلچسپی ہے تو اسے دوبارہ مذاکرات کی میز پر لوٹنا ہو گا۔ ان کا کہنا تھا کہ اسٹیبلشمنٹ کسی سیاسی عمل میں شامل ہونا نہیں چاہتی۔

فیصل آباد میں میڈیا سے گفتگو کرتے ہوئے طلال چوہدری نے کہا کہ ژوب حملے میں پنجاب سے تعلق رکھنے والے 9 افراد شہید ہوئے، جبکہ بلوچستان میں پنجابیوں کے خلاف مخصوص بیانیہ پروان چڑھایا جا رہا ہے۔ ان کے مطابق، یہ بیانیہ بھارت کی سرپرستی میں چلنے والی پراکسیز کے ذریعے گھڑا جا رہا ہے، حالانکہ پنجاب نے این ایف سی ایوارڈ کے تحت بلوچستان کو اس کا مکمل حق دیا ہے۔

انہوں نے کہا کہ شہید ہونے والے افراد صرف پنجابی نہیں بلکہ پاکستانی تھے، جبکہ حملہ آور دراصل "فتنۂ ہندوستان" کے دہشت گرد تھے۔ طلال چوہدری نے واضح کیا کہ پنجاب میں بلوچ اور پشتون برادری نہ صرف آباد ہے بلکہ فعال طور پر کاروبار بھی کر رہی ہے۔

وزیر مملکت کا کہنا تھا کہ دہشت گردوں کے روابط بیرون ملک سے جڑے ہوئے ہیں، اور افسوس کی بات ہے کہ کچھ عناصر نفرت کے ایجنڈے میں انسانیت کو فراموش کر بیٹھے ہیں۔ انہوں نے مزید کہا کہ بلوچستان سے نکلنے والی گیس کا 70 فیصد حصہ وہیں استعمال کیا جاتا ہے، جس سے یہ تاثر غلط ثابت ہوتا ہے کہ وسائل پر قبضہ کیا گیا ہے۔

سیاسی صورتحال پر بات کرتے ہوئے طلال چوہدری نے کہا کہ اسٹیبلشمنٹ نے خود کو سیاسی معاملات سے الگ رکھا ہے، اور اگر پی ٹی آئی کو بات چیت درکار ہے تو وہ پارلیمانی پلیٹ فارم، بالخصوص اسپیکر قومی اسمبلی کے ذریعے مذاکرات کا راستہ اختیار کرے۔