میرے بھائی کے خلاف الیکشن جیت کر دکھائیں، علی امین کا فضل الرحمان کو چیلنج

وزیر اعلیٰ خیبر پختونخوا علی امین گنڈا پور نے لاہور میں پارٹی رہنماؤں کے ہمراہ پریس کانفرنس کے دوران جمعیت علمائے اسلام (ف) کے رہنما مولانا فضل الرحمان کو کھلا چیلنج دے دیا۔ گنڈا پور نے کہا کہ مولانا فضل الرحمان نے ان کے مینڈیٹ کو جعلی قرار دیا، جبکہ وہ خود فارم 47 کے ذریعے منتخب ہوئے ہیں۔

انہوں نے کہا، "مولانا کو چیلنج ہے کہ میرے بھائی کے خلاف الیکشن جیت کر دکھائیں، اگر وہ جیتے نہیں تو سیاست چھوڑ دیں۔"

دو روز قبل مولانا فضل الرحمان نے خیبر پختونخوا میں حکومت میں تبدیلی کی ضرورت پر زور دیا تھا اور کہا تھا کہ یہ تبدیلی پی ٹی آئی کے اندر سے ہونی چاہیے۔

علی امین گنڈا پور نے اس بیان پر ردعمل دیتے ہوئے کہا، "مولانا ہمیں تبدیلی کا مشورہ دینے کے بجائے پہلے خود کو بدلیں تو بہتر ہوگا۔"

دوسری جانب، جمعیت علمائے اسلام (ف) کے سینیٹر کامران مرتضیٰ نے ایک پروگرام میں کہا کہ پارٹی کا کسی حکومت کو گرانے کا کوئی ارادہ نہیں ہے، تاہم علی امین گنڈا پور کے رویے اور زبان کے حوالے سے تحفظات موجود ہیں۔