ایرانی صدر مسعود پزشکیان اسرائیلی حملے میں زخمی، ترک میڈیا نے انکشاف کر دیا

ترک خبر رساں ایجنسی "انادولو" نے ایرانی ذرائع ابلاغ کے حوالے سے انکشاف کیا ہے کہ حالیہ اسرائیل-ایران کشیدگی کے دوران ایرانی صدر مسعود پزشکیان کو ایک اسرائیلی حملے میں معمولی چوٹیں آئی ہیں۔

رپورٹ کے مطابق، 17 جون کو تہران میں ایران کی اعلیٰ قیادت ایک محفوظ مقام پر اجلاس میں مصروف تھی، جب اسرائیل نے اس عمارت کے داخلی و خارجی راستوں کو چھ پروجیکٹائلز سے نشانہ بنایا۔ اس حملے میں صدر پزشکیان کی ٹانگ پر معمولی زخم آئے، تاہم ایرانی صدر اور دیگر اعلیٰ حکام بحفاظت عمارت سے باہر نکلنے میں کامیاب رہے۔

ترک میڈیا کا کہنا ہے کہ ایرانی حکام کو شبہ ہے کہ اس حملے سے متعلق حساس معلومات ممکنہ طور پر اندرونی ذرائع سے لیک ہوئی تھیں، جس کے باعث اسرائیل کو اپنے نشانے پر ایران کی قیادت کا اجلاس معلوم ہو سکا۔

فارس نیوز کے مطابق، اسرائیل نے ماضی میں بھی اسی نوعیت کے حملے کیے ہیں، جن میں حزب اللہ کے سابق سربراہ حسن نصر اللہ کو نشانہ بنانے کی کوشش شامل ہے۔

یاد رہے کہ 13 جون کو اسرائیل نے ایران کے جوہری تنصیبات، عسکری مراکز اور شہری علاقوں پر میزائل حملے کیے تھے جن کے نتیجے میں 606 افراد ہلاک اور 5 ہزار سے زائد زخمی ہوئے تھے۔ ایران کی جانب سے شدید جوابی کارروائیاں کی گئیں جن میں 29 افراد جان سے گئے اور 3,400 سے زائد زخمی ہوئے۔

دونوں ممالک کے درمیان جاری 13 روزہ جنگ 24 جون کو امریکہ کی ثالثی اور مداخلت کے بعد ختم ہوئی۔