سیکریٹری جنرل یو این کا اسحاق ڈار سے ٹیلی فونک رابط،تنازعات کے حل کیلئے عزم کا اعادہ

اسلام آباد:اقوام متحدہ کے سیکریٹری جنرل انتونیو گوتریس نے نائب وزیراعظم اور وزیرخارجہ اسحاق ڈار سے ٹیلی فونک رابطہ کیا اور نائب وزیرخارجہ نے سلامتی کونسل کی صدارت کے دوران تنازعات کے حل کے لیے پاکستان کے عزم کااعادہ کیا۔

وزارت خارجہ کی جانب سے جاری کر دہ بیان کے مطابق نائب وزیراعظم اور وزیرخارجہ اسحاق ڈار سے اقوام متحدہ کے سیکریٹری جنرل انتونیو گوتریس نے ٹیلی فونک رابطہ کیا۔

بیان میں کہا گیا کہ پاکستان کے پاس جولائی کے مہینے کے لیے اقوام متحدہ کی سلامتی کونسل کی صدارت ہے،دوران گفتگو نائب وزیر اعظم و وزیر خارجہ نے بین الاقوامی امن و سلامتی اور تنازعات کے پُرامن حل کے لیے پاکستان کے پختہ عزم کا اعادہ کیا۔

اقوام متحدہ کے سیکریٹری جنرل انتونیو گوتریس سے گفتگو کے دوران اسحاق ڈار نے ان مقاصد کو آگے بڑھانے کے لیے پاکستان کی جانب سے اپنے دور صدارت میں منعقد کیے جانے والے دستخطی پروگراموں پر بھی روشنی ڈالی۔

وزارت خارجہ کی جانب سے جاری بیان میں مزید بتایا گیا کہ دونوں رہنما اگلے ہفتے نیویارک میں اقوام متحدہ کی سلامتی کونسل کی پاکستان کی صدارت سے متعلق سرگرمیوں کے دوران ملاقات کریں گے۔

بیان کے مطابق اسحاق ڈار نے اقوام متحدہ اور اس کے عملے کو ان کے مینڈیٹ کی مؤثر ادائیگی میں سہولت فراہم کرنے میں پاکستان کی مسلسل حمایت کا اعادہ کیا۔